د لویې پکتیا ځوانانو د شهیدانو او معلولینو په چارو کې د دولت وزیر ښاغلي لعل الدین آریوبي سره وکتل
ځوان کهول کولی شي د هیواد ټولو ستونزو او ناخوالو ته د پای ټکی کیږدي.
د لویې پکتیا ځوانانو ټولنو ګډې جرګې مشرتابه غړي د شهیدانو او معلولینو په چارو کې د دولت وزیر ښاغلي لعل الدین آریوبي سره وکتل.
د جرګګۍ رئیس ښاغلي آرین پکتیار د لویې پکتیا ( پکتیا، پکتیکا، خوست او لوګر ) د ځوانانو ټولنو ګډې جرګې لاسته راوړنو او راتلونکي پلانونو په اړه معلومات شریک کړه او تر څنګ یې ددې سیمې د ولسونو د ستونزو یادونه هم وکړه. نوموړي د ښاغلي وزیر لعل الدین آریوبي له لوري ولسونو ته د ښوونې او روزنې، ولسي انسجام او اقتصادي پیاوړتیا په برخه کې ترسره شوي کارونه اغېزناک او ګټور وګڼل او هیله یې وښوده، چې د لویې پکتیا د ولسونو د سیاسي مشارکت او اقتصادي پیاوړتیا لپاره لا نور ګټور ګامونه هم واخیستل شي.
ښاغلي آریوبي د لویې پکتیا د ځوانانو ټولنو ګډې جرګې کارونه او لاسته راوړنې وستایلې او له ټولو ځوانانو څخه یې مننه وکړه. ښاغلي آریوبي د جرګګۍ غړو ته د حکومت د پراختیایي پروګرامونو په اړه معلومات ورکړه وویل، زموږ موخه د ولسونو خدمت او اقتصادي پیاوړتیا ده. ښاغلي آریوبي د بشپړ همکارۍ او د لویې پکتیا ستونزو ته د رسیدګۍ ډاډ ورکړ.
