د شهیدانو او معلولینو چارو وزارت او د انساني مرستو ټولنې ترمنځ د هوکړه لیک لاسلیک
د شهیدانو او معلولینو چارو وزارت د شهیدانو ورثه وو او معلولینو د پالنې مرکز لپاره، د څښاک پاکو اوبو د برابرولو په موخه، د انساني مرستو ټولنې سره د (۷۷۲۷) ډالرو په ارزښت هوکړه لیک لاسلیک کړ. د دې هوکړې له مخې به په یاد مرکز کې د څاه کیندلو پروژه عملي شي، ترڅو د فني او حرفوي زده کړو له زده کوونکو لپاره د څښاک صحي اوبه برابرې شي.
یاد هوکړه لیک د دې وزارت د بهرنیو اړیکو، پلان او تقنین چارو رئیس محترم ملا صدو خان حق شناس او د انساني مرستو ټولنې د استازي محترم سخي الرحمن ایثاروي ترمنځ لاسلیک شو، په یاده پروژه کې د څاه کیندلو ترڅنګ، د لمریزې برېښنا د تولید په موخه د سولرونو نصب کول، د اوبو زېرمه تون (ذخیرې) جوړول او د نورو اړینو وسایلو برابرول شامل دي.
