د فاریاب ولایت د شهیدانو او معلولینو چارو رئيس د افغانستان لپاره د ناروې کمېټې له عمومي رئیس سره وکتل
د فاریاب ولایت د شهیدانو او معلولینو چارو رئیس محترم الحاج داملا محمد نادر خالد د افغانستان لپاره د ناروې کمېټې له عمومي رئیس تاریه مگنوسن واتردال سره په خپل کاري دفتر کې وکتل.
په دې کتنه کې محترم الحاج داملا محمد نادر خالد، د دې ولایت د یتیمانو، کونډو او معلولینو پر وړاندې پرتې ستونزې او ننګونې د ناروې کمېټې له رئیس سره شریکې کړې او له هغه یې وغوښتل چې د يتيمانو لپاره د زده کړو، کاري فرصتونو رامنځته کولو او بهر ته د درملنې په موخه د معلولينو په استولو کې له دې رياست سره همکاري وکړي.
په ورته وخت کې د ناروې د کمیټې عمومي رئیس هم د جګړې متضررینو او بې ځایه شویو خلکو ته د خدمتونو د وړاندې کولو په برخه کې د یادې کمېټې لخوا د ترسره شوېو فعالیتونو په هکله معلومات وړاندې کړل او د یتیمانو، کونډو او معلولینو د ستونزو د حل په برخه کې یې د هر اړخیزو همکاريو ژمنه وکړه.
