د شهیدانو ورثه ؤ او معلولینو د پالنې په مرکز کې یو سل او شل (۱۲۰) تنو یتیمانو او معلولینو د حرفوي زده کړو د پروګرامونو له بشپړولو وروسته تصدیقنامې ترلاسه کړې

د شهیدانو او معلولینو چارو وزارت د یتیمانو او معلولینو لپاره څه موده وړاندې د خیاطۍ، کمپیوټر، د برښنائي وسایلو د ترمیم، د مبایلونو، جنراتورونو، یخچالونو او د موټرسایکلونو د ترمیم په برخو کې د حرفوي زده کړو پنځه میاشتنی روزنیز پروګرام پیل کړی وو چې د دې دورې تر بشپړولو وروسته هغوی ته د یوې غونډې په ترڅ کې د شهیدانو او معلولینو چارو وزیر محترم الحاج ملا عبدالمجید آخند له خوا تصدیقنامې ورکړل شوې.

دغه پروګرام چې د شهیدانو ورثه ؤ او معلولینو د پالنې په مرکز کې جوړ شوی وو، په هغه کې د ریاست الوزراء اداري مرستیال محترم مولوي عبدالسلام حنفي، د شهیدانو او معلولینو چارو وزارت مسلکي او تخنیکي چارو مرستیال محترم الحاج  ملا عبدالرزاق آخند، د شهیدانو او معلولینو چارو مرستیال محترم شیخ صاحب عبدالحکیم حقاني، د بهرنیو چارو وزارت د مالي او اداري چارو مرستیال محترم مولوي رحمت الحق، د لوړو زده کړو وزارت د مالي او اداري چارو مرستیال محترم حافظ محمد حمید حسیب، د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان، د دې وزارت ځینو رئیسانو او آمرینو او د (HHRD) خیریه مؤسسې مسؤلینو ګډون کړی وو.

په دې پروګرام کې د ریاست الوزراء اداري مرستیال محترم مولوي عبدالسلام حنفي خبرې وکړې او زیاته یې کړه: اسلامي امارت د مسؤلیتونو په درک او پیژندلو سره د تیرې ادارې یتیمان، کونډې او معلولین د اسلامي امارت د شهیدانو ورثه ؤ او معلولینو په څیر پرته له هرډول تبعیض ثبت او راجستر کړي او هغوی ته مساعدتونه ورکوي.

هغه همداراز د شهیدانو او معلولینو چارو وزارت له رهبرۍ څخه د دې ډول روزنیزو پروګرامونو دایرولو څخه مننه وکړه او وې ویل: اسلامي امارت د تیر کال په ترڅ کې د شهیدانو ورثه ؤ او معلولینو ته دیارلس میلیارده افغانۍ توزیع کړې دي. نوموړي همداراز د ملي سوداګرو او خیرخواه اشخاصو څخه وغوښتل تر څو د یتیمانو د تعلیم او تربیې او د کونډو او معلولینو د لاس نیوي په برخه کې لازمې مرستې ترسره کړي.

په دې پروګرام کې د شهیدانو او معلولینو چارو وزارت مرستیال محترم شیخ صاحب عبدالحکیم حقاني هم خبرې وکړې او زیاته يې کړه: اسلامي امارت د اسلام سپیڅلي دین د احکامو په رڼا کې د یتیمانو، کونډو، معلولینو او اړمنو کسانو کفالت پر غاړه لري او هغوی ته یې په روان مالي کال کې له یوولس میلیارده افغانيو څخه ډیرې پیسې د نغدي مرستو په توګه حواله کړې دي.

هغه همداراز زیاته کړه: د شهیدانو او معلولینو چارو وزارت په نوښت نن موږ او تاسې د فني او حرفوي زده کړو په بیلابیلو برخو کې د یو سل او شل تنو یتیمانو او معلولینو د فراغت شاهدان یو چې په دې سره به د هغوی اقتصادي وضعیت کې مثبت بدلون رامنځ ته او د اقتصادي ځان بساېنې په لور به ګامونه پورته کړي.

په دې پروګرام کې د شهیدانو او معلولینو چارو وزارت د مالي او اداري چارو عمومي رئیس محترم مولوي کلیم الله افغان هم د فني او حرفوي زده کړو پر ارزښت او اهمیت خبرې وکړې او ویې ویل: دې وزارت د (HHRD) مؤسسې سره په همکارۍ یتیمانو او معلولینو ته په شپږو بیلابیلو حرفو کې د زده کړې زمینه برابره کړې چې د دې دورې له بشپړولو سره به هغوی اقتصادي ځان بساېنې ته ورسیږي.

هغه همداراز د خپلو خبرو په ترڅ کې د بانکي سیستم له لارې د پر وخت او شفاف ډول د مساعدتونو د ورکړې یادونه وکړه او زیاته یې کړه: دې وزارت تر دې دمه یوولس میلیارده او څه باندې اته څلویښت میلیونه افغانۍ په مرکز او ولایتونو کې د شهیدانو ورثه ؤ او معلولینو ته ورکړي دي.

په دې پروګرام کې د بهرنېو چارو وزارت مالي او اداري چارو مرستیال محترم مولوي رحمت الحق او د لوړو زده کړو وزارت مالي اواداري چارو مرستیال محترم حافظ محمد حمید حسیب هم په ترتیب سره د اسلام په سپیڅلي دین کې د یتیمانو د کفالت پر ارزښت هراړخیزې خبرې وکړې او د شهیدانو او معلولینو چارو وزارت له رهبرۍ څخه یې د دې ډول روزنیزو پروګرامونو د دایرولو په پار مننه وکړه.

د دې پروګرام په ترڅ کې د شهیدانو ورثه ؤ معلولینو د پالنې مرکز رئیس محترم ملا رحمت الله خالد د دې روزنیز پروګرام پر څرنګوالي خبرې وکړې او ویې ویل: په دې دوره کې د مرکز او ولایتونو یو سل او شل تنه یتیمان او معلولینو ته د پنځه میاشتو په ترڅ کې په بیلابیلو برخو کې زده کړې ورکړل شوې او دا مرکز په پام کې لري تر څو زده کوونکو په جذب کې زیاتوالی راولي.

د دې پروګرام په پای کې یاد شویو زده کوونکو ته د کسب او کار د پیل کولو په موخه اړوند تخنیکي وسایل او ابزار هم ورکړل شول.