د عالیقدر امیرالمؤمنین حفظه الله د فرمانونو، هدایتونو او حکمونو د تعقیب او نظارت په اړه د شهیدانو او معلولینو چارو وزارت کې غونډه ترسره شوه
په هغه غونډه کې چې په همدې موخه د شهیدانو اومعلولینو چارو وزارت کې جوړه شوې وه په هغه کې د بشري سرچینو رئیس محترم مولوي محمد موسی صدیقي، د دعوت او ارشاد رئیس محترم مفتي عبدالاحد مسعود، د ټولنیزو خدمتونو د تنظیم رئیس محترم مولوي ثناء الله فرقاني، د بهرنیو اړیکو او پلان رئیس محترم ملا صدوخان حق شناس او د اطلاعاتو او عامه اړیکو رئیس مفتي فیصل خاموش همداراز د فرمانونو او حکمونو د تعقیب او نظارت د عمومي ریاست د ټولنیزو چارو، چاپیریال او خوندیتوب د څارنې مرستیال محترم مولوي سیف الله ذکي ګډون کړی وو.
د دې غونډې اصلي موخه چې په یاد وزارت کې د عالیقدر امیرالمؤمنین شیخ القرآن والحدیث مولوي هبة الله آخندزاده حفظه الله د فرمانونو او حکمونو څخه په عملي توګه تعقیب او څارنه وه، په هغه کې د بشري سرچینو رئیس محترم مولوي محمد موسی صدیقي د شهیدانو اومعلولینو چارو وزارت کې د عالیقدر امیرالمؤمنین حفظه الله د فرمانونو او حکمونو د تعقیب او پر وخت د عملي کیدلو په تړاو خبرې وکړې او زیاته یې کړه: د شهیدانو اومعلولینو چارو وزارت د ډیر ځوریدلي او اړمن قشر (یتیمانو، کونډو او معلولینو) خدمت کوي، اړوند مسؤلین او کارکوونکي یې په پوره ريښتینولي خپلې دندې پر مخ وړي.
نوموړي زیاته کړه: په دې وزارت کې د فرمانونو او حکمونو د تعقیب په موخه یوه کمیټه جوړه شوې چې یاده کمیټه په پوره اخلاص سره خپل کارونه سرته رسوي.
په دې غونډه کې د ټولنیزو چارو، چاپیریال او خوندیتوب د څارنې ریاست مرستیال محترم مولوي سیف الله ذکي د غونډې له ګډونوالو څخه وغوښتل تر څو د فرمانونو د ښه تعقیب او څارنې په برخه کې لازمې آسانتیاوې برابرې او له یاد ریاست سره پوره همکاري وکړي.
په ورته وخت کې د شهیدانو او معلولینو چارو وزارت د بشري سرچینو رئیس محترم مولوي محمد موسی صدیقي د یاد ریاست استازو ته د پوره همکارۍ ډاډ ورکړ.
