د معلوليت لرونکو وګړو د بياپياوړتيا برخه خورا مهمه ده او په دې تړاو به کوټلي ګامونه پورته شي
د معلوليت لرونکو وګړو د بياپياوړتيا برخه خورا مهمه ده او په دې تړاو به کوټلي ګامونه پورته شي
نن شنبه د غبرګولي په ۲۲ مه، د شهيدانو او معلولينو چارو سرپرست وزير پوهنمل حميدالله فاروقي د مشرانو جرګې سناتورې آغلې ملیحې جامي په ګډون، د اورتوپيدي او فزيوتراپي متخصصينو سره وکتل او د معلوليت لرونکو وګړو د بياپياوړتيا په برخو کې يې د شته فرصتونو، لاسته راوړنو او ستونزو په تړاو خبرې وکړې.
په پيل کې د ناستې ګډونوالو په نوبت د معلوليت لرونکو وګړو د بياپياوړتيا او فزيکي رغونې په هکله خپل نظرونه، غوښتنې، ستونزې، مشورې او وړانديزونه شريک کړل او په دې برخه کې له وزارت څخه د همغږۍ، ګډکار او خدمتونو د پراختيا غوښتونکي شول.
د دوی په خبره، چې د معلوليت لرونکو وګړو د بياپياوړتيا په برخه کې شوي کارونه بسنه نه کوي او دغه خدمتونه بايد پراخ، باکيفيته او چټک شي.
د ارتوپيدي او فزيوتراپي متخصصينو له ښاغلي فاروقي څخه هيله وکړه، چې د معلوليت ملي ستراتيژي د پلې او د معلوليت لرونکو وګړو لپاره دې ټولشموله پاليسي جوړه شي، څو پر بنسټ يې د معلولينو لپاره د بياپياوړتيا په برخه کې هم اړينې اسانتياوې بربرې شي.
ورپسې د شهيدانو او معلولينو چارو سرپرست وزير پوهنمل حميدالله فاروقي د دوی نظرونه، غوښتنې او وړانديزونه پرځای او مهم وګڼل او په دې تړاو يې د هر اړخيزو همکاريو ډاډ ورکړ.
ښاغلي فاروقي څرګنده کړه، چې که څه هم په افغانستان کې څلور لسيزې روانې جګړې او ناورين د دولت سرچينې او امکانات محدود کړي؛ خو د شهيدانو او معلولينو چارو وزارت ژمن دی، چې د ټولنې زيات اغيزمن او جګړې ځپلي قشر لپاره د ژوند اسانتياوې برابرې کړي او د هغوی ستونزو ته رسيدنه وکړي.
ښاغلي فاروقي زياته کړه، چې د معلوليت ملي ستراتيژي بشپړه شوې او د جلالتمآب ولسمشر تر توشیح وروسته د پلې کيدو وړ ده.
نوموړي ژمنه وکړه، چې د معلوليت لرونکو وګړو د بياپياوړتيا او فزيکي رغونې برخې ته به پاملرنه زياته کړي او په دې تړاو به اړونده چارواکو ته د لازمو اقداماتو د ترسره کیدو لارښوونه وکړي.
په پای کې ښاغلي فاروقي د همغږۍ پر زياتوالي، ګډکار او هراړخيزې همکارۍ ټينګار وکړ او له يادو متخصصينو څخه يې وغوښتل، چې د معلولينو د بياپياوړتيا په برخه کې د چارو د ښه والي، چټکتيا او روڼتيا په تړاو له وزارت سره همکار پاتې شي.
