ملي يووالی او زغم مو ټولشموله او تلپاتې سولې ته رسولای شي
ملي يووالی او زغم مو ټولشموله او تلپاتې سولې ته رسولای شي
نن سه شنبه د غبرګولي په ۴مه، د شهيدانو او معلولينو چارو سرپرست وزیر پوهنمل حميدالله فاروقي، د مشرانو جرګې لومړي مرستيال محمد علم ايزديار سره په خپل کاري دفتر کې وليدل او د شهيدانو ورثې او معلولينو ستونزو ترڅنګ يې ورسره په هېواد کې د تلپاتې سولې د ټينګښت په تړاو هم خبرې وکړې.
په پيل کې ښاغلي ایزدیار د شهيدانو او معلولينو چارو وزارت سرپرست ته د نوي مسوليت مبارکي ورکړه او په چارو کې يې ورته د بريا هيله وکړه.
نوموري په وزارت کې د وروستيو اصلاحاتو، سیسټم جوړونې، له يوې واحدې دريڅې د خدمتونو وړاندې کولو، د فساد مخنيوی او روڼتيا د ټينګښت په تړاو د ښاغلي فاروقي کارونه وستايل او له خپله اړخه يې ورته د هر ډول همکارۍ او ملاتړ ډاډ ورکړ.
د ښاغلي ايزديار په خبره، چې افغانستان په اوسنيو شرايطو کې تر بل هر وخت ملي يووالي، زغم او يو بل منلو ته اړتيا لري او د يو واحد ملت په اډانه کې ټولشموله او تلپاتې سولې ته رسيدلای شو.
د شهيدانو او معلولينو چارو سرپرست وزير پوهنمل حميدالله فاروقي د ښاغلي ايزديار له راتګ او مبارکۍ مننه وکړه او د شهيدانو ورثې او معلوليت لرونکو وګړو لپاره خدمت يې د ځان لپاره ستر وياړ وګاڼه.
نوموړي په وزارت کې اصلاحات او د فساد پر وړاندې مبارزه خپل مسوليت وباله او په دې تړاو يې د جدي اقداماتو د ترسره کيدو ژمنه وکړه.
ښاغلي فاروقي د مشرانو جرګې لومړي مرستيال د خبرو په تاييد، په افغانستان کې جګړه د فساد او ګډوډيو اصلي زيږنده وشميرله او هېوادوال يې د سولې ټينګښت په برخه کې يووالي او مثبت رول لوبولو ته را وبلل.
د ناستې په پای کې ښاغلي ایزدیار د افغاني دود له مخې ښاغلي فاروقي ته د نوي مسووليت مبارکۍ په پار چپنه هم ډالۍ کړه.
