د شهيدانو او معلولينو چارو وزارت له همکارو موسسو سره د همغږۍ ناسته وکړه
د شهيدانو او معلولينو چارو وزارت له همکارو موسسو سره د همغږۍ ناسته وکړه
نن يکشنبه د غويي په ۱۹مه، د شهيدانو او معلولينو چارو وزارت د برنامو او همغږۍ مرستيالې صبرۍ اندړ په مشرۍ د وزارت په غازي امان الله خان تالار کې د معلوليت په برخه کې له همکارو نړيوالو او کورنيو موسسو سره د همغږۍ ناسته وکړه.
د ناستې په پيل کې د شهيدانو او معلولينو چارو وزارت تخنيکي سلاکار حبيب خان ځاځي، ګډونوالو ته د معلوليت ملي ستراتيژۍ په تړاو په لنډ ډول معلومات ورکړل او د پلې کولو په برخه کې يې له ملاتړو موسسو د همکاريو غوښتنه وکړه.
د ځاځي په خبره، چې د معلوليت ملي ستراتيژۍ په پلې کولو سره به د معلوليت لرونکو وګړو د روغتيا، زدکړو، کارموندنې، فزيکي لاسرسي، ټولنيز ګډون، ورزش، بياپياوړتيا، ځان بساينې او عدالت ته د لاسرسي په برخو کې د ستونزو هواري سبب وګرځي.
د ملاتړو او همکارو موسسو استازو هم هر يوه په خپل وار د همغږۍ په زياتوالي، همکارۍ او ګډکار ټينګار وکړ او ژمنه يې وکړه، چې له وزارت سره په همغږۍ به د معلوليت لرونکو وګړو د ژوند اسانتياوو برابرولو لپاره په کډه کار او هڅو ته دوام ورکوي.
دوی د معلوليت ملي ستراتيژۍ د پلې کولو او نورو اړونده خدمتونو ترسراوي په تړاو د دولت په کچه، د شهيدانو او معلولينو چارو وزارت ته ځانونه مسوول وګڼل او په دې هکله يې د هر ډول ژمنتيا ډاډ ورکړ.
په پای کې د شهيدانو او معلولينو چارو وزارت د برنامو او همغږۍ مرستيالې صبرۍ اندړ د بحث په ډلبندۍ سره وويل، اوسمهال تر بل هر وخت په افغانستان کې د ملاتړو نړيوالو او کورنيو موسسو او مرستندويه بنسټونو سره همغږي زياته شوې او د لا پياوړتيا لپاره به يې مهم ګامونه پورته شي.
نوموړې زياته کړه، چې لا هم په ځينو برخو چې ستونزې شته او دا ډول پرلهپسې ناستې، د ستونزو شريکول او د نظرونو تبادله به يادې ستونزې راکمې او حل کړي.
آغلې اندړ معلوليت لرونکو وګړو ته د خدمتونو وړاندې کول او ستونزو ته رسيدنه د وزارت کاري لومړيتوبونه وګڼل او په دې تړاو يې د هر ډول لازمو اجرااتو د ترسراوي ژمنه وکړه.
