د شهيدانو او معلولينو په چارو کې د دولت وزير لعل الدين آريوبي د بدخشان ولايت د شهيدانو او معلوليت لرونکو وګړو د اسنادو د څېړنې کميسيون له غړو سره وکتل
د شهيدانو او معلولينو په چارو کې د دولت وزير لعل الدين آريوبي د بدخشان ولايت د شهيدانو او معلوليت لرونکو وګړو د اسنادو د څېړنې کميسيون له غړو سره وکتل
د ولايتي سفر په ترڅ کې، د شهيدانو او معلولينو په چارو کې د دولت وزير ښاغلي لعل الدين آريوبي، د معلولینو په چارو کې د ولسمشر سلاکار عمرا خان منیب، د بدخشان محترم والي ذکریا سودا او په ولسي جرګه کې ته بدخشان د خلګو استازی ډاکټر ضیا یفتلي په ګډون، د ولايت د شهيدانو او معلولينو چارو د اسنادو د څېړنو کميسيون له غړو سره ليدنه وکړه.
په دې ليدنه کې د بدخشان د محکمې، لويې څارنوالۍ، عامې روغتيا، د احصايې او معلوماتو ادارې او ملي امنيت رئيسانو، د شهيدانو او معلولينو چارو آمر او د ولايت مقام باصلاحيته استازو ګډون درلود.
محترم آريوبي صيب، د شهيدانو او معلولينو چارو د اسنادو د څيړنې کمېسيون له غړو سره د ياد کمېسيون پر کار او د اسنادو د څيړنو پروسې د لا شفافيت په موخه د برېښنايي پېژندپاڼو د وېش پر چټکتيا خبرې وکړې.
د ښاغلي آريوبي په خبره، چې دوی ته د شهيدانو وارثینو او معلوليت لرونکو وګړو د ستونزو حل لومړيتوب لري او هغوی ته د ژوند له لومړنيو اړتياوو را نيولې تر روغتيايي او تحصيلي زمينو برابرولو پورې اسانتياوې بايد برابرې شي.
نوموړي د بدخشان اړوندو ادارو ته سپارښتنه وکړه، چې د شهيدانو وارثينو، کورنيو غړو او معلوليت لرونکو وګړو ستونزو ته دې پر وخت رسېدنه وکړي.
د ناستې په پای کې د بدخشان د شهيدانو او معلولينو چارو د اسنادو څېړنې کميسيون غړو له محترم وزير صيب او ور سره مل پلاوي څخه مننه وکړه، چې د ياد ولايت د شهيدانو وارثينو او معلوليت لرونکو وګړو غوښتنې، ستونزې او وړاندېزونه يې له نږدې واورېدل او په همدې موخه يې بدخشان ته سفر را وکړ.
ښاغلي لعل الدين آريوبي د شهيدانو او معلوليت لرونکو وګړو د اسنادو پروسې پر شفافيت د ټينګار تر څنګ، د وزارت له اړخه له ټولو ولايتي چارواکو سره د هر ډول همکاريو ژمنه وکړه.
