د شهيدانو او معلولينو په چارو کې د دولت وزير لعل الدين آريوبي د لوګر له مستوفي سره وليدل
د شهيدانو او معلولينو په چارو کې د دولت وزير لعل الدين آريوبي د لوګر له مستوفي سره وليدل
نن دوشنبه (۳۱وږې)، د شهيدانو او معلولينو په چارو کې د دولت وزير، لعل الدين آريوبي لوګر ته د خپل سفر په ترڅ کې، له والي او د اسنادو د څېړنې کميسيون د غړو له کتنو وروسته، د لوګر ولايت له مستوفي سره د شهيدانو او معلولينو د حقوقو او امتيازاتو د ورکړې او بانکي سازۍ په تړاو ناسته وکړه.
په ياده ناسته کې، چې د لوګر ولایت مرستیاله او د لوګر د شهيدانو او معلولينو چارو آمر يې هم ملتيا کوله، ښاغلي آريوبي د شهيدانو وارثينو او معلوليت لرونکو وګړو ته د حقوقو او امتيازاتو د ورکولو په برخه کې د اسانتياوو را منځته کولو او بانکي سازۍ په هکله خپل وړاندېزونه، غوښتنې او لارښونې له محترم مستوفي سره شريکې کړې.
د لوګر مستوفي له ښاغلي لعل الدين آريوبي او مل پلاوي څخه مننه وکړه، چې د لوګر جګړو ځپلو ولسونو د ستونزو د اورېدو او حل په موخه يې دغه ولايت ته سفر کړی او د شهيدانو وارثينو او معلوليت لرونکو وګړو ته د امتيازاتو د ورکړې پروسې د ساده سازۍ او بانکي سازۍ بهير د چټکتيا په تړاو يې له خپله اړخه د پوره همکارۍ ډاډ ورکړ.
