د کابل ولایت اړوند د سل (۱۰۰) تنو عامو وګړو لپاره د کمپیوټر روزنیز پروګرام پیل شو
د شهیدانو ورثه ؤ او معلولینو د پالنې په مرکز کې د سل (۱۰۰) تنو عامو وګړو لپاره د کمپیوټري پروګرامونو روزنیز پروګرام پیل شو، یاد ښوونیز پروګرام د اچ، اچ، آر، ډي نړیوالې مؤسسې په مالي ملاتړ د شهیدانو ورثه ؤ او معلولینو د پالنې مرکز په همغږۍ په لاره واچول شو، د دې روزنیز پروګرام په ترڅ کې به ګډونوالو ته د پنځه میاشتو په موده کې عملي او نظري زده کړې ورکړل شي. چې په دې سره به، نه یوازې د ګډونوالو کاري وړتیاوې لوړې شي، بلکه هغوی ته به د کار او فعالیت زمینه هم برابره شي.
د یادونې وړ ده چې د یادو زده کوونکو د نوملیکنې بهیر د شهیدانو ورثه ؤ او معلولینو د پالنې مرکز رئیس محترم ملا رحمت الله خالد په لارښوونه د یوې ځانګړې کمېټې لخوا په دقیق او منظم ډول پرمخ یوړل شو، چې له بشپړیدو سره سم یې د زده کوونکو لپاره یاد روزنیز پروګرام پېل شو.
