د معلولینو ملي ستراتېژۍ د وروستۍ بیا کتنې د درېيمې ورځې فعالیت
د معلولینو ملي ستراتېژۍ د وروستۍ بیا کتنې د درېيمې ورځې فعالیت
د معلولینو ملي ستراتېژۍ د وروستۍ بیا کتنې ورکشاپ په درېیمه ورځ ګډونوالو د يادې ستراتيژۍ په تړاو بحثونه په ګروپي ډول ترسره کړل. نن بيا هم د معلولینو استازي په پینځو کاري ګروپونو وېشل شوي وو، تر څو د ستراتیژۍ د پراختیا او هر اړخیزه کولو لپاره خپلې غوښتنې، نظرونه او وړاندیزونه په ګروپي ډول مطرح او وړاندې کړي.
دغه کاري ګروپونه د لويانو لپاره د زده کړو زمينو برابرولو او لوړو زده کړو ته د لاسرسي، فزيکي او رواني روغتيايي بنسټونو رامنځته کول، ټولنيز ملاتړ او عامه پوهاوی، د معلوليت لرونکو وګړو او د هغوی کورنيو لپاره د ځان بساینې او په ياده ستراتيژۍ کې معلوليت لرونکو نجونو شاملولو کټګوریو او کروپونو باندې وېشل شوي وو او د هر ګروپ استازي د ګروپ د غړو له لوري لیکل شوي نظرونه، وړاندیزونه او غوښتنې د ورکشاپ ګډونوالو ته واورل او په دې اړه یې پوښتنو ته ځوابونه وويل.
د ګروپونو استازو په ټولنه کې د معلولینو پر وړاندې پرتو ستونزو، ننګونو، د امکاناتو او فرصتونو محدودیت او نورو اړوندو مسایلو او حل لارو هر اړخیز بحثونه وکړل.
ټاکل شوې چې د معلوليت ملي ستراتېژۍ د وروستۍ بیا کتنې ورکشاپ به څلورو ورځې دوام کوي، چې کډونوال به يې په ګروپي ډول معلولینو ته د خدمتونو وړاندې کولو په مېکانېزمونو او دوی ته د بودجې موندنې، فزیکي لاسرسي، زده کړو، اسانتیاوو، کارموندنې، روغتیایي، عامه پوهاوي او نور فرصتونو په اړه خپلې غوښتنې او نظرونه شريکوي، څو ياده ستراتيژي بشپړه او د پلې کيدو جوګه وګرځي.
