د شهیدانو او معلولینو چارو وزارت کې له معلولیت لرونکو وګړو سره نغدي مرسته وشوه
څلویښت تنه معلولیت لرونکي وګړې د وزارت له نغدي مرستو څخه برخمن شول، دغه نغدې مرستې چې پنځه زره افغانۍ په کې شاملې وې، د دانا مرستندویه موسسې له خوا پر معلولیت لرونکو وګړو وویشل شوې.
د دانا مرستندویه موسسې مشر احمد سعيدي چې د دغو نغدي مرستو د ويشلو مسووليت يې په غاړه لرلو، زياته کړه: د دې پيسو په ويشلو سره کولاى شو چې د اړمنو کسانو لاسنیوې وکړو او په سختو اقتصادي شرايطو کې له هغوى سره مرسته وکړو.
د شهیدانو او معلولینو چارو وزارت د پلان او همغږۍ مشر ښاغلي سید عظیم آغا د دې ادارې له مرستو ستاینه وکړه او له اړمنو کسانو سره یې د همکارۍ په برخه کې یو ګټور ګام وباله او د ټولو بډایه افغانانو او همدا رنګه د کورنیو او بهرنیو مرستندویه بنسټونو څخه وغوښتل چې په دې سختو شرایطو کې د خپلو اړمنو هیوادوالو لاسنیوی وکړي او ورسره همکاري او مرسته وکړي.
دا په داسې حال کې ده چي په هیواد کې معلولیت لرونکي وګړي له ناوړه اقتصادي وضعیت سره مخ دي او د اسلامي امارت په راتلو سره به د مرستو د ویش لړۍ په شفاف او اساسي ډول پر مستحقینو وویشل شي.
