د شهیدانو او معلولینو چارو وزارت کونډو، یتیمانو او معلولینو ته د خوراکي توکو د وېش او چمتو کولو په موخه د بشري مرستو ټولنې مؤسسې سره د همکارۍ هوکړه لیک لاسلیک کړ
یاد هوکړه لیک چې د دې وزارت د پلان، پالیسۍ او بهرنېو اړیکو رئیس محترم ملا صدوخان حق شناس او د بشري مرستو ټولنې مؤسسې مسؤل محترم نصر الله شینواري ترمنځ لاسلیک شو، د هغه پر بنسټ به، په کابل ولایت کې (۲۵۰) تنو اړمنو یتیمانو، کونډو او معلولینو ته خوراکي مواد چمتو او ووېشل شي.
د یادونې ده، چې د دې پروژې ټولیز ارزښت (۱۴) زره او (۷۳۰) امریکایي ډالره کېږي چې د يوې مياشتې په موده کې به د کابل ولايت د شهيدانو او معلولينو چارو رياست په همغږۍ پلي شي.
