د شهیدانو او معلولینو چارو وزارت مسلکي او تخنیکي مرستیال د سره صلیب د نړیوالې کمیټې د آسیایي برخې له ځانګړي استازي سره په خپل کاري دفتر کې وکتل
د شهیدانو او معلولینو چارو وزارت د مسلکي او تخنیکي چارو مرستیال محترم الحاج ملا عبدالرزاق اخند د سره صلیب د نړیوالې کمیټې د آسیایي برخې له ځانګړي استازي محترم ریټو سټاکر سره وکتل. د دې کتنې په ترڅ کې د بهرنېو اړیکو او پلان رئیس محترم ملا صدوخان حق شناس، د افغانستان لپاره د سره صلیب نړیوالې کمیټې د معلولینو د فزیکي بیاوړتیا موندنې د پروژې مسؤل محترم نجم الدین هلال، د افغانستان لپاره د سره صلیب نړیوالې کمیټې سلاکار محترم عزت ګل او د اړوندو څانګو آمرینو ګډون درلود.
په دې کتنه کې د شهیدانو او معلولینو چارو وزارت مسلکي او تخنیکي مرستیال محترم الحاج ملا عبدالرزاق آخند معلولینو ته د خدمتونو وړاندې کولو د څرنګوالي په اړه خبرې وکړې او زیاته یې کړه: د شهیدانو او معلولینو چارو وزارت معلولیت لرونکو وګړو ته په ټول هېواد کې یو شان خدمتونه وړاندې کوي، هڅه مو داده چې د دې مظلوم او اړمن قشر (یتیمانو، کونډو او معلولینو) پر وړاندې پرتو ستونزو او ننګونو ته پوره رسیدګي وکړو تر څو د هغوی ستونزې په بشپړه توګه حل شي.
هغه همداراز په افغانستان کې د سره صلیب د نړیوالې کمیټې فعالیتونو ته هم اشاره وکړه او ویې ویل: هغه خدمتونه چې د سره صلیب نړیواله کمیټه یې په هېواد کې معلولیت لرونکو وګړو ته وړاندې کوي ښه به وي چې هغه د شهیدانو او معلولینو چارو وزارت سره په همغږۍ ترسره شي نو په دې ترتیب به په هېواد کې ټولو معلولینو ته غوره او یو شان خدمتونه وړاندې شي.
ورپسې د سره صليب د نړيوالې کمېټې د آسيايي برخې ځانګړي استازي ریټوسټاکر په افغانستان کې د دې کمېټې د فعاليتونو او لاسته راوړنو په اړه هر اړخيز معلومات وړاندې کړل او زياته يې کړه: د سره صليب نړيواله کمېټه د کابل په ګډون په ننګرهار، هرات، هلمند، بلخ او بدخشان ولایتونو کې د معلولیت لرونکو وګړو لپاره د ارتوپیډي، د کاري فرصتونو زمینې برابرولو، حرفوي زده کړو او د اقتصادي ځان بساینې لپاره اړمنو معلولینو ته د کوچنیو پورونو د ورکړې په برخه کې خدمتونه وړاندې کړي دي.
نوموړي د خبرو په ترڅ کې وویل: د شهیدانو او معلولینو چارو وزارت د کمو مالي امکاناتو د درلودلو سربیره بیا هم معلولیت لرونکو وګړو ته د پام وړ خدمتونه وړاندې کړي دي. هغه زیاته کړه: اړتیا ده چې د سره صلیب نړیواله کمیټه د شهیدانو او معلولینو چارو او د عامې روغتیا وزارتونو سره په همغږۍ هغو معلولینو ته چې تر اوسه یې په بشپړه توګه خدمتونو ته لاسرسی نه درلود هغوی ته د غوره خدمتونو د وړاندې کولو زمینه برابره کړي.
په دې کتنه کې د شهیدانو او معلولینو چارو وزارت د بهرنیو اړیکو او پلان رئیس محترم ملا صدوخان حق شناس هم خبرې وکړې او ویې ویل: دې وزارت د شهیدانو ورثه ؤ او معلولینو ته د ثبت او راجسټر په موخه ځانګړی ډېټابېس رامنځ ته کړی چې په هغه کې د یادو کسانو ځانګړتیاوې ثبت شوې. همدارنګه دې وزارت د معلولینو د ځان بساېنې په موخه د حرفوي زده کړو یو مرکز جوړ کړی چې په هغه کې د شهیدانو ورثه ؤ او معلولینو ته په بیلابیلو برخو کې زده کړې ورکول کیږي.
