د شهیدانو او معلولینو چارو وزارت سرپرست او نوماند وزیر په ملګرو ملتونو کې د افغانستان له دایمي استازي سره وکتل
د شهیدانو او معلولینو چارو وزارت سرپرست ښاغلی پوهنمل حمیدالله فاروقي، له ښاغلي غلام محمد اسحق زی( په ملګرو ملتونو کې د افغانستان دایمي استازې) سره وکتل او د شهیدانو وارثینو او معلولیت لرونکو وګړو پر اړوندو موضوعاتو باندې خبرې وکړې.
ښاغلی فاروقی په دې وزارت کې د ښاغلی اسحق زی له راتګ څخه مننه وکړه او د هغه د ښه راغلاست ترڅنګ د شهیدانو او معلولینو وزارت د برنامو، فعالیتونه، لاسته راوړنو او ټولو هغو بندیزونو په هکله چې د خدمتونو د وړاندې کولو په وړاندې شتون لري، ورسره خبرې وکړې. او زیاته یې کړه چې دغه وزارت د شفافیت د رامنځته کولو په لټه کې دی او کوښښ کوي چې د شهیدانو او معلولیت لرونکو وګړو وارثینو ته ښه خدمت رسونه وکړي.
د شهیدانو او معلولینو چارو وزارت سرپرست وویل: چې دغه وزارت د قانون سره سم د شهیدانو او معلولیت لرونکو وګړو وارثینو حقونه او امتیازونه ورکړی دي او د ملي او بین المللي اړوندو بنسټونو په همغږۍ سره معلولیت لرونکو وګړو ته د وړتیا بیا موندنې، د زده کړې د زمینې د برابرولو اود کارموندنې په برخه کې کار کوي. د یو لړمعلوماتو له مخې د معلولیت لرونکو وګړو شمېر هره ورځ مخ په زیاتېدو کې دي او که داسې دوام وکړي نو دغه خدمتونه به بسنه نه کړي.
ښاغلی فاروقي وویل: چې دغه وزارت د بودیجوي کموالي او د تیروکلنو د مقروضیت له امله د خپل برنامو او فعالیتونو په ترسره کولو کې له سترو ستونزو او کړاوونو سره مخ دي، چې د دې کړاوونو حل بین المللي مرستې ، په ځانګړې توګه نړیوالو ټولڼو مالي او تخنیکي مرستو ته اړتیا لري.
د وزارت سرپرست په ملګرو ملتونو کې د افغانستان له دایمي استازي څخه وغوښتل چې تر څو په ملګرو ملتونو کې د نورو هېوادونو او استازو سره د ډیپلماټیکو خبرو اترو او مذاکراتو په وخت کې د شیهدانو او معلولیت لرونکو وګړو موضوعګانې په پام کې ولري او په دې برخه کې له هغوی څخه د هر اړخیزې همکاريو غوښتوونکي شي.
په ملګرو ملتونو کې د افغانستان دایمي استازي ښاغلی غلام محمد اسحق زۍ د شهیدانو وارثینو او معلولیت لرونکو وګړو پر اړوندې موضوعګانې باندې، په ملګروملتونو کې د نورو هېوادونو د استازو سره له ډيپلماټیکو خبرو اترو او مذاکراتو څخه وزارت سرپرست ته ډاډ ورکړه او زیاته يې کړه چې په نیورک کې د نړیوالې ټولڼې له مسوولینو سره د تعاووني صندوق د جوړولو په اړه باندې به خبرې وکړي.
په ملګرو ملتونو کې د افغانستان دایمي استازي وویل: چې د شهیدانو وارثینو او د معلولیت لرونکو وګړو د ګډون لوړولو موضوع او همدا راز د شهیدانو او معلولیت لرونکو وګړو پر وړاندې د کلتور او ټولنیز فرهنګ بدلون موضوع مهمه وبلله او ژمنه یې وکړه چې په دې اړه به د نړیوالو سازمانونو او ټولڼو له استازو سره خبرې وکړي او په دې برخه کې به له هغوی څخه مالي او تخنیکي مرستې وغواړي.
