د شهیدانو او معلولینو چارو وزارت د معلولینو لپاره د حرفوي زده کړو زمینې برابرولو، فزیکي خدمتونو ته د لاسرسي او د هغوی د بیاوړتیا موندنې په برخو کې د( AOAD) مؤسسې سره هوکړه لیک لاسلیک کړ.
د شهیدانو او معلولینو چارو وزارت د پلان او همغږۍ رئیس ښاغلي سید محمد عظیم آغا د (AOAD) مؤسسې مسؤل ښاغلي حمیدالله خالقي سره معلولیت لرونکو وګړو ته د حرفوي زده کړو د زمینې برابرولو، معلولینو ته د فزیکي خدمتونو لاسرسی او د هغوی د بیاوړتیا موندنې په برخو کې هوکړه لیک لاسلیک کړ.
د یاد هوکړه لیک له مخې به (۶۳۶۰) تنو معلولینو ته د حرفوي زده کړو زمینې برابرولو، بیاوړتیا موندنې او فزیکي خدمتونو ته د لاسرسي زمینه برابره شي.
د دې هوکړه ليک د لاسليک پر مهال د شهيدانو او معلولينو چارو وزارت د پلان او همغږۍ رئيس ښاغلي سيد محمدعظيم آغا د يادې مؤسسې له خدمتونو څخه مننه وکړه او زياته يې کړه: د تېرې څلوېښت کلنې جګړې په ترڅ کې د دې هېواد زیات شمېر کورنیو قربانۍ ورکړې دي، هیله ده چې د یاد هوکړه لیک مادې په سمه او پوره اخلاص سره پلي شي.
د یادونې وړ ده چې یاد خدمتونه به د یوه کال په موده کې د څلور سوه زره امریکایي ډالرو په مجموعي لګښت په کابل ولایت کې بشپړ شي.
