د شهیدانو او معلولینو چارو وزارت د مالي او اداري چارو عمومي رئیس د پکتیا ولایت د شهیدانو او معلولینو چارو ریاست څخه لیدنه وکړه
د شهیدانو او معلولینو چارو وزارت د مالي او اداري چارو عمومي رئیس ښاغلي مولوي كلیم الله افغان د یو لړ ولایتي سفرونو په ترڅ كې د یو پلاوي سره د پکتیا ولایت د شهیدانو او معلولینو چارو ریاست څخه لیدنه وکړه. په دې سفر کې د شهیدانو او معلولینو چارو وزارت د مالي او حسابي رئیس ښاغلې قاري محمد امین درویش ، د څارنې او ارزونې، د تفتیش او همدارنګه د بشري سرچینو ریاستونو استازیو د ښاغلي مولوي کلیم الله افغان ملتیا کوله، د پکتیا ولایت د شهیدانو او معلولینوچارو ریاست د کارکوونکو د کړنو څرنګوالې یې وڅیړل، او یاد ریاست پر وړاندې یې شته ستونزې او ننګونې واورېدې.
د شهیدانو او معلولینو چارو وزارت پلاوي د یاد ولایت دشهیدانو او معلولینوچارو ریاست د کارکوونکو او ادارې عمومي ارزونه وکړه، او د ادارې د لا ښه والي په موخه یې لازمې لارښوونې ورکړې، او په همدې حال کې یې د بودیجې مصرفولو پر چټکتیا او د بودیجې د ښه او پر ځاې لګولو پر مخ د پرتو ستونزو او ننګونو د حل پر لارو چارو هم لازمې سپارښتنې وکړې.
د دې سفر په لړکې ښاغلي مولوي کلیم الله افغان ولایتي رئیسان یې له طرحې سره سم د بودیجې مصرفولو ته و هڅول، تر څو د بودیجې په مصرفولو کې ګړندیتوب او چټکتیا را منځته شي.
په دې كتنه كې د پكتیا ولایت د شهیدانو او معلولینو چارو رئیس ښاغلې مولوی محمد نبي محمدی د اداري تعمیر د نشتوالي، د معلولینو لپاره دمعلولیت لرونکو وګړو لپاره د آسایشګاه د نشتوالي او همدا راز د نقلیه وسایطو د نشتوالی یادونه وكړه ، د شهیدانو او معلولینو د چارو وزارت د مالي او اداري چارو عمومي رئیس ښاغلې مولوي كلیم الله افغان هم د دغه ریاست د ستونزو له اوریدو وروسته د ستونزو د حل لپاره د لازمو همكاریو ژمنه وکړه .
په پام کې ده چې ښاغلي مولوي کلیم الله افغان د دغو ولایتي سفرونو په لړ کې د خوست او پکتيکا ولایتونو دشهیدانو او معلولینو چارو ریاستونو څخه هم لیدنه وکړي، چې د دې سفر اصلي موخه یې د طرحې سره سم په بودیجې مصرفولو کې د چټکتیا رامنځته کول او د بودیجې د لګولو پر وړاندې د پرتو ستونزو او ننګونو له منځه وړل، او همداراز د اړوندو رياستونو د کړنو او فعالیتونو د څرنګوالي ارزونه ده.
