د شهیدانو او معلولینو چارو وزارت د رهبرۍ غونډه وشوه
د شهیدانو او معلولینو چارو وزارت د رهبرۍ غونډه وشوه
د شهیدانو او معلولینو چارو د سرپرست وزیر پوهنمل حمید الله فاروقي په مشرۍ د وزارت د رهبرۍ غونډه ترسره شوه، چې مرستیالانو، رییسانو، مشاورینو او نورو مسولینو پکې ګډون درلود.
په پیل کې ښاغلي فاروقي له جمهور رئيس سره د شهيدانو ورثې او معلولينو ناسته ګټوره وبلله وويل: د شهيدانو او معلولينو لپاره د حکومت رهبري د لا زياتې پاملرنې را خپلولو لپاره بايد ژر تر ژره د وزارت د پرمختګونو، لاسته راوړنو، اړتياوو او غوښتنو ټوليز راپور چمتو او د جمهوري رياست عالي مقام ته ولېږل شي، څو د کابينې په ناسته کې هراړخيز بحث ته وړاندې شي.
ښاغلي فاروقي د همغږۍ پیاوړتیا، د عدالت، روڼتیا، سیستم تطیبق، فساد سره مبارزه او د چارو منظمول، خپل دیني او وظیفوي مسولیتونه وګڼل زیاته یې کړه، چې ټولې چارې به د ورکړل شویو صلاحیتونو او قانون پر بنسټ ترسره او هیچاته به اجازه ور نه کړي، چې فساد او نورو ناقانونه کړنو ته لاره هواره کړي. د دې تر څنګ یې ټولو مسولینو ته لارښوونه وکړه، چې په یاد ډول خپل مسولیتونه په صادقانه ډول ترسره کړي، تر څو د شهیدانو کورنۍ او معلولین پر خپل وخت له حقوقو او امتیازاتو برخمن شي.
په دغه ناسته کې د عوایدو د حساب پرانيستلو، د ولایتي روزنيزو ورکشاپونو د تنظیم او څرنګوالي او د دې وزارت د فصلنامې د رامنځته کولو په اړه بحث وشو.
په پای کې، ښاغلي فاروقي اړوندو څانګو ته لارښوونه وکړه چې د وضعیت د ښه والي او لا اسانه کولو لپاره تصویب شوې مسلې پلي کړي.
نوموړي یوځل بیا بیروکراسي او په اداره کې د زړو سیستمونو کارول د منلو وړ نه وبلل او د ښې حکومتدارۍ او د نوې ټکنالوژۍ او میتودونو کارولو لپاره یې د اړينو لارښودونو چمتو کولو لارښوونه وکړه.
