د شهیدانو او معلولینو چارو سرپرست وزیر د AID خیریه بنسټ له مسوول سره وکتل
د شهیدانو او معلولینو چارو وزارت سرپرست وزیر ښاغلي ملا عبدالمجید اخوند د ترکیې هیواد د AID خیریه بنسټ له مسوول ښاغلي مصطفی یلماس سره وکتل.
په دې کتنه کې ښاغلي مصطفی يلماس د AID خيريه بنسټ د فعاليتونو په اړه اړین معلومات وړاندې کړل او زياته يې کړه: دغه خیریه بنسټ معلوليت لرونکو وګړو ته د مصنوعي غړو جوړولو او همدارنګه د سترګو عمليات کولو په برخه کې په ګڼ شمیر هیوادونو کې پراخ فعالیتونه لري.
د شهیدانو او معلولینو چارو سرپرست وزیر ښاغلي ملا عبدالمجید اخوند هم د معلولیت لرونکو وګړو د ستونزو او ننګونو یادونه وکړه او زیاته یې کړه : چې په مرکز او ولایتونو کې زیات شمیر معلولین لرو چې د خیریه موسسو مرستو ته اړتیا لري او په ستونزو کې دي په دی سختو اقتصادي شرایطو کې موږ باید له دوی لاسنیوی وکړو.
ښاغلي یلماس دغه راز په راتلونکو اونۍ کې په هغو ولایتونو کې چې د معلولیت لرونکو وګړو اړتیا زیاته ده، د ۳۶۰ ویلچیرونو د وېش خبر هم ورکړ او دغه راز یې د شهیدانو او معلولینو چارو وزارت له مشرتابه وغوښتل چې د خدمتونو د وړاندې کولو لپاره مناسب ځای برابر کړي ترڅو د معلولیت لرونکو وګړو سره اړیني مرستې وکړي.
د خبرو په ترڅ کې د شهيدانو او معلولينو چارو وزارت د دفتر رئيس ښاغلي قاري شاه محمد دوست د AID خيريه بنسټ له مسوول څخه وغوښتل، چې د بیا رغونې رياست فعاليتونه چې مصنوعي غړي په کې جوړېږي، بېافعاله کړي.
د ناستې په پای کې مصطفی یلماس د شهیدانو او معلولینو چارو وزارت سرپرست ته ډاډ ورکړ، چې دغه خیریه بنسټ به ورسره لا زیاتې همکاري وکړي او همدا رنګه د مصنوعي غړو د جوړولو بهیر به په با کیفیته موادو ترسره شي.
