د سمنګان ولایت والي د سلو (۱۰۰) څخه زیاتو یتیمانو لپاره د روژه ماتي ځانګړی پروګرام ترتیب کړ
د سمنګان ولايت والي محترم الحاج داملا محمد شعیب رسالت د اسلامي امارت د شهیدانو د یادونې په مناسبت د سلو (۱۰۰) څخه زیاتو یتیمانو لپاره د روژه ماتي ځانګړی پروګرام ترتیب کړ.
د دې پروګرام په ترڅ کې د سمنګان ولايت والي یتیمانو ته د اختر لپاره د جامو او ډالېو د ورکړې ترڅنګ د هغوی سره خواخوږۍ او همدردي وکړه او وې ویل: په هېواد کې امنيت او آرامي د شهیدانو د وینو برکت دی او ټول ملت باید د هغوی قدر وکړي.
نوموړي یتیمانو ته ډاډ ورکړ چې تر هغو چې په سمنګان ولایت کې وي، د هغوی د هر ډول ستونزو په حل کې به ورسره مرسته وکړي.
په دې پروګرام کې د سمنګان ولایت د شهیدانو او معلولینو رئیس محترم قاري قیامالدین خالد د یاد ولایت له والي څخه مننه وکړه او ټینګار یې وکړ چې د شهیدانو ورثه وو ته باید ځانګړې پاملرنه وشي، ترڅو په سمه توګه د هغوی ستونزو او غوښتنو ته رسیدګي وشي.
