د احصایې او معلوماتو ملي ادارې د اسان خدمت برخه دې خپلې نیمګړې چارې بشپړې کړي
د احصایې او معلوماتو ملي ادارې د اسان خدمت برخه دې خپلې نیمګړې چارې بشپړې کړي
د شهیدانو او معلولینو چارو سرپرست وزیر پوهنمل حمید الله فاروقي د احصایې او معلوماتو ملي ادارې د اسان خدمت برخې مسولینو سره وکتل او د دې وزارت د واحدې دریڅې د نیمګړو چارو پر بشپړېدو یې تاکید وکړ.
ښاغلي فاروقي د شهیدانو ورثې او معلولیت لرونکو وګړو لپاره د نویو طرحو او سیستمونو پر بنسټ د کاري پروسو ساده کول د دولتي ادارو لپاره مهم اقدام وګڼه او په دې برخه کې یې د همکاري او همغږۍ رامنځته کول اړین وبلل زیاته یې کړه، چې د شهیدانو او معلولینو چارو وزارت کې د واحدې دریڅې خدمتونه رامنځته کول بنسټیز ګام و، چې په تېر کې پورته شوی دی، خو د دواړو ادارو تر منځ د لاسلیک شوي هوکړه لیک پر بنسټ د واحدې دریڅې خدمتونو چارې، چې د کاری پروسو په بشپړه توګه ساده کول، مراجعینو ته د اسانتیا رامنځته کول او د تخنیکي وسایلو له اړخه یې سمبالول پکې شامل وو، پر خپل وخت بشپړې شوې نه دي. مهمه ده چې په اړه یې بیاکتنه وشي.
ښاغلي فاروقي د وزارت مسولینو ته لارښوونه وکړه، چې د احصایې او معلوماتو ملي ادارې سره په همغږۍ یو مشترک پلاوی وټاکي او له هر اخیزې ارزونې وروسته د واحدې دریڅې د نابشپړو شویو چارو د بشپړولو لپاره اقدام وکړي، تر څو پاتې کارونه ژر تر ژره ترسره او د شهیدانو درنې ورثې او معلولیت لرونکو وګړو ته د دوی له رضایت سره سم خدمتونه وړاندې شي.
ښاغلي فاروقي د احصایې او معلوماتو ملي ادارې د اسان خدمت برخې له مسولینو مننه وکړه، چې د پاتې چارو د بشپړولو لپاره یې وزارت ته تشریف راوړ او لاسلیک شوي هوکړه لیک ته یې خپله ژمنیتا ثابته کړه.
