د شهيدانو او معلولينو په چارو کې د دولت وزير لعل الدين آريوبي پروان ولایت کې د معلولینو او د شهیدانو د ورثې اسنادو او وثیقو د څېړنې کميسيون غړو سره وکتل
د شهيدانو او معلولينو په چارو کې د دولت وزير لعل الدين آريوبي پروان ولایت کې د معلولینو او د شهیدانو د ورثې اسنادو او وثیقو د څېړنې کميسيون غړو سره وکتل
نن سه شنبه (د تلې اتمه) د ولايتي سفر په ترڅ کې د شهيدانو او معلولينو په چارو کې د دولت وزير ښاغلي لعل الدين آريوبي، د ولايت د شهيدانو او معلولينو د اسنادو او وثیقو د څېړنو کميسيون له غړو سره ليدنه وکړه.
په دې ليدنه کې د پروان د محکمې، لويې څارنوالۍ، عامې روغتيا، د احصايې او معلوماتو ادارې او د شهيدانو او معلولينو چارو آمر او د ولايت مقام باصلاحيته استازو ګډون درلود.
ښاغلي آريوبي، د شهيدانو او معلولينو د اسنادو او وثیقو د څيړنې کمېسيون غړو سره د ياد کمېسيون پر کار او د اسنادو د څيړنو پروسې د لا شفافيت په موخه او د برېښنايي پېژندپاڼو د وېش پر چټکتيا خبرې وکړې.
ښاغلي آريوبي وویل، چې د شهيدانو د وارثینو او معلوليت لرونکو وګړو د ستونزو حل یې لومړيتوب دی او دغه قشر ته باید د ژوند له لومړنيو اړتياوو را نيولې تر روغتيايي او تحصيلي زمينو برابرولو پورې اسانتياوې برابرې شي.
ښاغلي آریوبي د پروان ولایتي ادارو ته څرګنده، چې د شهيدانو د وارثينو او معلوليت لرونکو وګړو ستونزو ته د رسېدنې برخه کې همکاري وکړي.
د شهيدانو او معلولينو د اسنادو او وثیقو د څېړنې کميسيون غړو ښاغلي آريوبي او ورسره پلاوي څخه مننه وکړه، چې د ياد ولايت د شهيدانو وارثينو او معلوليت لرونکو وګړو غوښتنې، ستونزې او وړاندېزونه يې له نږدې واورېدل.
ښاغلي آريوبي د شهيدانو او معلوليت لرونکو وګړو د اسنادو پروسې پر روڼتيا د ټينګار تر څنګ د وزارت له اړخه ټولو ولايتي مسولینو سره د همکاريو د پراختیا ژمنه وکړه او د همغږۍ پر ټینګښت یې تاکید وکړ.
