د شهیدانو او معلولینو چارو وزارت مرستیال په لغمان ولايت کې د شهیدانو وارثینو د ملاتړ په موخه جوړه شوې غونډه کې ګډون وکړ
د شهیدانو او معلولینو چارو وزارت مرستیال محترم شیخ صاحب عبدالحکیم حقاني په لغمان ولایت کې د شهیدانو د یاد او د هغوی له وارثينو سره د مرستې په موخه جوړه شوې غونډه کې ګډون وکړ، چې په یاده غونډه کې د لغمان والي محترم قاري بختیار معاذ، د شهیدانو او معلولینو چارو رئيس محترم حاجي فيض الله جواد، مرستیال والي، د علماو شورا رئیس، امنیه قومندان، د ملکي او نظامي ادارو استازو، دیني عالمانو، مجاهدینو، د شهیدانو وارثینو او زرګونو عامو خلکو ګډون کړی وو.
په دې غونډه کې د ولایت والي مرستیال د قرآن عظیم الشان او د نبوي صلی الله علیه وسلم د مبارکو احادیثو په رڼا کې د شهیدانو پر لوړ مقام خبرې وکړې او د محلي ادارو مسؤلینو ته یې سپارښتنه وکړه چې د شهیدانو کورنیو ته ځانګړې پاملرنه وکړي، د هغوی غوښتنو ته لومړیتوب ورکړي او په دوامداره توګه دې د یتیمانو د کورنیو پوښتنه وکړي.
همداراز د شهیدانو او معلولینو چارو رئیس محترم حاجي فیض الله جواد په خپلو خبرو کې وویل؛ لغمان کې د شهیدانو د یاد ساتنې او د هغوی د کورنیو خدمت د دې ریاست له اساسي مسؤلیتونو څخه دی او په همدې موخه یې له اړوندو ادارو او موسسو سره دوامدارې ناستې ترسره کړي دي.
په همدې حال کې د لغمان ولایت د علماوو شورا رئیس محترم شیخ محمد سلیم حقاني په اسلام سپېڅلي دين کې د شهیدانو پر لوړ مقام او منزلت خبرې وکړې او له خلکو یې وغوښتل چې د شهیدانو ورثه وو ته ځانګړې پاملرنه ولري.
د یادې غونډې په ترڅ کې د شهیدانو هرې کورنۍ سره يوه اندازه نغدي مرسته هم ترسره شوه.
په ورته وخت کې د شهیدانو د کورنیو استازو د غونډې له جوړېدو او له هغوی سره د شویو مرستو څخه خوښي څرګنده کړه.
