د شهیدانو او معلولینو وزارت سرپرست وزير محترم الحاج ملا عبدالمجید آخند د يوې یتیمې ماشومې د درملنې په موخه (۱۵۰۰۰۰) افغانۍ نغدي مرسته وکړه
مؤمینه، یوه یتیمه او ناداره ماشومه، د تیرې ادارې د وژل شوي عسکر ګل محمد لور، د غزني ولایت د قره باغ ولسوالۍ اوسېدونکې ده. دا کوچنۍ نجلۍ، له اوږدې مودې راهیسې د زړه له یوې خطرناکې ناروغۍ سره مخ وه او په کور کې یوازې یوه مور، یوه خور، او یو ۱۱ کلن ورور لري. مؤمینه د یوې داسې ناروغۍ سره مخ وه چې په زړه کې یې یوه (۷) سانتيمتري دانه راختلې وه. ډاکترانو په غزني کې له معایناتو وروسته د هغې د تداوي هیله پرې کړې وه او وړاندیز یې کړی وو چې باید کابل ته يوړل شي، هلته به یې درملنه امکان ولري.
وروسته له دې چې مؤمینه په کابل کې د فرانسويانو روغتون ته یووړل شوه، هلته ډاکترانو وويل چې د هغې عملیاتو ته لږ تر لږه (۳۵۰۰۰۰) افغانۍ اړتیا ده او که چیرې دا عملیات و نه شي، د هغې ژوند به له ستر ګواښ سره مخ شي. دا د هغې کورنۍ لپاره یوه ستره ستونزه وه، ځکه چې هغوی د دې لګښت د برابرولو وس نه درلود.
په ډېرو دردونو او نا امیدیو سره، د مؤمینې کورنۍ خپل اسناد او ایکسرې د غزني ولایت د شهیدانو او معلولینو چارو ریاست ته یوړل. هلته د یاد رياست رئيس محترم ملا عبدالحکیم دانش د دې موضوع له اورېدو وروسته، ژمنه وکړه چې دا موضوع به د وزارت له مقام سره شریکوي، تر څو له دې بېوسې کورنۍ سره مرسته وشي.
محترم مولوي عبدالحکیم دانش، د مؤمینې د وضعیت او د هغوی د اقتصادي حالت راپور، د شهیدانو او معلولینو چارو وزارت محترم وزیر صاحب ته وړاندې کړ. محترم وزیر صاحب چې له طبیعي شفقت او انساني حسه برخمن دی، (۱۵۰۰۰۰) افغانۍ د عاجلې مرستې په توګه منظور کړې او د اړوندو روغتیایي مراجعو سره یې د تماس نیولو، د عملیاتو د اسانتیا برابرولو، او د دې ماشومې د بشپړې درملنې همکارۍ وکړه.
همداراز، د وزارت له خوا یادې کورنۍ ته بلنه ورکړل شوه او د تداوي لپاره مکتوب اړوند روغتون ته صادر شو. په پایله کې د ۱۴۴۷ هـ ق کال د محرم الحرام میاشتې په ۲۱ مه نېټه، مؤمینه په کابل کې د سټار میډیکل کمپلیکس روغتون کې تر جراحي عملیاتو لاندې ونیول شوه او الحمدلله، عملیات یې بریالي شول.
نن، مؤمینه بېرته ژوند ته راګرځېدلې ده. دا یوه معجزه نه، بلکې د خدای ﷻ رحم، د مور دعا او د مهربانو مسؤلینو د شفقت پایله ده.
د غزني ولایت د شهیدانو او معلولینو چارو ریاست، له محترم وزیر صاحب څخه د دې مهربانانه اقدام څخه مننه او قدرداني وکړه.
