د شهیدانو او معلولینو چارو وزارت مرستیال محترم شیخ صاحب عبدالحکیم حقاني لغمان ولایت ته د خپل سفر په ترڅ کې د یو شمېر خاصو شهیدانو له کورنېو سره وکتل
د شهیدانو او معلولینو چارو وزارت مرستیال محترم شیخ صاحب عبدالحکیم حقاني د دې سفر په ترڅ کې د لغمان ولایت د شهیدانو او معلولینو چارو ریاست د کاري بهیر د ارزونې ترڅنګ د یو شمېر خاصو شهیدانو (فدایانو) له کورنیو سره له نږدې وکتل او له هغوی سره یې نغدي مرسته وکړه.
شیخ صاحب د خاصو شهیدانو له کورنېو سره په کتنه کې وویل: خاصو شهیدانو (فدایانو) د امریکې او د هغوی د متحدېنو په ماتولو کښې مخکښ رول درلود او د هغوی قربانۍ او سرښندنې نه هېرېدونکي دی او دا ستاسو د اولادونو د سرښندنو پایله ده چې نن زموږ په هېواد کې اسلامي نظام حاکم دی.
شیخ صاحب زیاته کړه: د شهیدانو او معلولینو چارو وزارت په ټولو یتیمانو باندې په مساوي توګه نغدي مرستې ویشي، دې وزارت د خاصو شهیدانو (فدایانو) کورنېو ته د شفافو او پر وخت خدمتونو د وړاندې کولو په موخه یو ځانګړی آمریت جوړ کړې دی.
نوموړي همدا راز زیاته کړه: د افغانستان اسلامي امارت دغه زیانمن شوي قشر ته ځانګړې پاملرنه لري او همدا لامل دی چې اوس د ډېرو یتیمانو ژوند د هغو کسانو په پرتله ښه شوی چې پلرونه یې ژوندي دي او د اسلامي امارت په ځانګړي ډول د شهیدانو او د معلولینو چارو وزارت، د هغوی قربانۍ او سرښندنې نه دي هیرې کړې او تل د دې ځوریدلي قشر تر شا ولاړ دی.
همداراز د دې سفر په ترڅ کې د شهیدانو او معلولینو چارو وزارت مرستیال د خاصو شهیدانو (فدایانو) له یو دیرش (۳۱) کورنېو سره مرسته ترسره کړه، چې هرې کورنۍ ته پنځلس زره (۱۵۰۰۰) افغانۍ د نغدي مرستې په توګه ورکړل شوې.
د یادولو وړ ده، شیخ صاحب عبدالحکیم حقاني چې د یاد وزارت د خاصو شهیدانو آمر محترم مولوی محمد اظهار یې ملتیا کوله د لغمان ولایت له محترم والي الحاج قاري زین العابدین عابد سره وکتل. په دې کتنه کې د شهیدانو او معلولینو چارو وزارت مرستیال محترم شیخ صاحب عبدالحکیم حقاني د لغمان ولایت د شهیدانو او معلولینو چارو ریاست پر وړاندې شته ستونزې د یاد ولایت له والي سره شریکې کړې او دې اړمن قشر ته د مرستو د جلب او ویش په برخه کې یې د ولایت د مقام د لازیاتو همکاریو غوښتنه وکړه.
