پر ښوونیزو او علمي مرکزونو بریدونه د ټولو جګړه ییزو اصول خلاف کړنه او بشري جنایت دی
پر ښوونیزو او علمي مرکزونو بریدونه د ټولو جګړه ییزو اصول خلاف کړنه او بشري جنایت دی
د شهیدانو او معلولینو په چارو کې د دولت وزیر لعل الدین آریوبي پر کابل پوهنتون د ترهګریز برید له کبله د تسلیت او ډاډګېرنې په موخه د لوړو زده کړو وزیر عباس بصیر او د کابل پوهنتون رییس محمد عثمان بابري سره د ناستو تر څنګ د کابل پوهنتون له ویجاړو شویو ټولګيو هم لېدنه وکړه.
ښاغلي آریوبي د لوړو زده کړو وزیر ښاغلي بصیر سره په لیدنه کې د شهیدو شویو محصلینو روح ته دعا او د پېښې ټپیانو ته د بېړنۍ روغتیا هیله وکړه زیاته یې کړه: محصلین بې دفاع خلک دي او یوازینۍ موخه یې د زده کړو ترلاسه کول دي. پر محصلینو او زده کوونکو دغه ډول ترهګریز بریدونه د ټولو جګړه ییزو اصولو خلاف عمل دی. علم، پوهې او اکاډمیکو مرکزونو سره د دښمنۍ ښکاره بېلګه ده، چې ترسره کوونکي یې جنایتکاران او د بخښنې وړ نه دي.
ښاغلي آریوبي په دویمه ناسته کې د یادې خونړۍ او غیر انساني پېښې له کبله د کابل پوهنتون رییس ښاغلي بابري او قدرمنو استادانو ته د تسلیت مراتب وړاندې کړه او دغه برید یې بشریت ضد عمل وګنه وویل: دا ډول بریدونه د افغانستان د خلکو او علم د دښمنانو کړنه ده، هیڅ شرعي جواز نلري.
ښاغلي آریوبي څرګنده کړه: د وزارت مسولینو ته یې لارښوونه کړې، تر څو د پېښې د شهیدانو کورنیو او ټپیانو ته د مرستو رسونې برخه کې بېړنی اقدام وکړي زیاته یې کړه، چې د وزارت له لوري ټاکل شوی پلاوی هره ورځ روغتونو ته ورځي او د ټپیانو پوښتنه کوي. کورنیو ته به یې مرستې ورسیږي او د شهیدانو ورثې ته به د کلنیو حقوقو ورکړې کتابچې ووېشل شي.
ښاغلی آریوبي له یادو ناستو وروسته د پوهنتون هغو ټولګیو څخه هم لیدنه وکړه، چې ترهګرو پکې بې ګناه محصلین شهیدان او ټپیان او ټولګي یې زیانمن کړي وو.
