د ننګرهار د شهيدانو او معلولينو چارو آمريت د شهيد اوونۍ ونمانځله
د ننګرهار د شهيدانو او معلولينو چارو آمريت د شهيد اوونۍ ونمانځله
د ننګرهار د شهيدانو او معلولينو چارو آمريت د ولايت محترم مقام، د ولايتي شورا غړو، د مدني فعالانو، ديني عالمانو، د شهيدانو ورثينو، د معلوليت لرونکو وګړو او سلګونه ننګرهاریانو په شتون او ګډون سره د شهيد اوونۍ څخه نمانځنه وکړه.
د غونډې په پيل کې د شهيدانو او معلولينو په چارو کې د ننګرهار ولايت د آمريت آمر لخوا، د شهيدانو او معلولينو په چارو د دولت وزارت وزير، لعل الدين آريوبي پيغام د شهيد اوونۍ په مناسبت ګډونوالو ته ولوست.
د آريوبي صيب په پيغام کې راغلي و، چې د شهيد اوونۍ له نمانځلو موخه، د شهيدانو له قربانيو او ښرښندنو څخه ستاینه او راتلونکو نسلونو ته د هغوی د لارې تعقيبولو انګيزه ورکول دي.
د ښاغلي وزير صيب په پيغام کې له ولايتي آمرينو څخه غوښتنه شوې وه، چې د شهيدانو ورثينو او معلوليت لرونکو وګړو په پار د خدمت په برخه کې دې له ژمنتيا، ريښتينوالۍ، د شهيدانو ورثينو او معلوليت لرونکو وګړو لپاره د غوره ژوند د اسانتياوو برابرولو او د مسوليتونو په سم ډول اجرا کولو له مخې دې خپلې دندې په پوره ايماندارۍ ترسره کړي.
د شهيد اوونۍ په وياړ په جوړه شوې ناسته کې، د ننګرهار نوي والي ضياوالحق امرخېل هم د شهيدانو ورثينو او معلوليت لرونکو وګړو لاسنيوی د هر روغ افغان مسووليت وباله او پر ولسونو يې د سولې د راتګ په پار په ګډه د کار کولو غږ وکړ.
همدارنګه د غونډې په بهير کې، د افغانستان د معلولينو ټولنې مشر مسعود ساپي، ديني عالم حبيب الله جمال او حاجي سيد الرحمن مومند د شهيدانو کارنامې او وياړونه، نه هیریدونکی وګڼل او ځوانان يې له اسلام، وطن، خاورې او ملي ګټو سره مينې او ژمنتيا ته راوبلل.
غونډه د سولې، ورورولۍ او جګړې د پای ته رسېدو په پار له دوعا سره پای ته ورسېده.
