د شهیدانو او معلولینو چارو وزیر محترم الحاج ملا عبدالمجید اخند او ورسره مل پلاوي بلخ ولایت ته د یوه سفر په ترڅ کې د یو شمېر فدایانو له کورنېو او معلولینو سره نغدي مرسته ترسره کړه
د شهیدانو او معلولینو چارو وزیر محترم الحاج ملا عبدالمجید اخند چې د دې وزارت د مالي او حسابي چارو رئیس محترم مولوي محمد امین دروېش، د خاصو شهیدانو آمر محترم مولوي محمد او د ډېټابېس او معلوماتو رياست د پروژې مالي مسؤل محترم مولوي شبیر احمد یې ملتیا کوله، د بلخ ولایت په چهاربولک، چمتال، بلخ او شولګرې ولسوالېو کې د فدایانو کورنېو سره یې له نږدې وکتل او ورسره یې نغدي مرستې ترسره کړې، محترم وزیر صاحب د فدایانو د کورنیو ستونزې واوریدې او له هغوی سره یې خپله خواخوږي او همدردي څرګنده کړه.
هغه همداراز له یو شمېر هغو معلولینو سره هم وکتل چې د تېر شل کلن جهاد پر مهال یې د خپل بدن دوه غړي له لاسه ورکړي وو، هغوی سره یې هم نغدي مرسته وکړه.
محترم الحاج ملا عبدالمجید اخند د دې سفر په ترڅ کې د بلخ ولایت د شهیدانو او معلولینو چارو ریاست له کاري بهیر څخه لیدنه وکړه او د شهيدانو ورثه ؤ او معلولينو ته د لا ښو او شفافو خدمتونو وړاندې کولو په موخه يې د اړوند رياست مسؤلينو ته لازمې لارښوونې او سپارښتنې وکړې.
