د کرونا سره مبارزه د ټولو ګډ مسؤلیت دی
د کرونا سره مبارزه د ټولو ګډ مسؤلیت دی
دوشنبه_ چنګاښ 7 _ 1400
د شهيدانو او معلولينو چارو وزارت د ملاتړ او خدمتونو وړاندې کوونکې مرستيالې جميلې نورستانۍ د عامې روغتیا وزارت د روغتیا ټیم سره په ګډه، د پارا المپیک کمیټې کې ګډون وکړ او د کمیټې غړو او هغه ورزشکارانو څخه چې په راتلونکي کې په ملي او نړیوالو سیالیو کې ګډون کوي وغوښتل تر څو د کورونا ویروس سره د مبارزې په برخه کې د عامې روغتیا وزارت سپارښتنې په پام کې ونیسي.
آغلې نورستاني د پارا المپیک کمېټې وروستیو فعالیتونو او لاسته راوړنو څخه یادونه وکړه او زیاته یې کړه چې د پارا المپیک کمیټې په دې ورستیو کې د سپورت په برخه کې د پام وړ لاسته راوړنې لري، هغې زیاته کړه چې د یادې کمیټې ورزشکارانو زیات شمیر محدودیتونه تر شا پریښې او یادې بریاوې تر لاسه کړي.
نوموړې هیله څرګنده کړه چې دغه کمېټه به وکولی شي د لا زیاتو هڅو سره ښې پایلې ترلاسه کړي او د سپورت په برخه کې د یوې بیلګې په توګه راڅرګنده شي.
آغلې نورستاني د کمیټې پر ټولو کارمندانو او ورزشکارانو غږ وکړ چې د کورونا ویروس سره د مبارزې لپاره واکسین تطبیق کړي ترڅو د دوی فعالیتونه د خنډ سره مخ نه شي. هغې همداراز وویل چې د کورونا ویروس سره مبارزه او د عامې روغتیا وزارت د ټیم سره همکاري د ټولو مشترک مسؤلیت دی.
د پارالمپیک کمیټې رئیس او غړو ژمنه وکړه چې د وزارت سره په همغږۍ کې به خپلې هڅې ګړندۍ او لا ډیرې بریاوې به ترلاسه کړي.
