د نظامي شهیدانو ورثې او معلولیت لرونکو وګړو لپاره د لوړو زده کړو فرصتونه چمتو شوي دي
د نظامي شهیدانو ورثې او معلولیت لرونکو وګړو لپاره د لوړو زده کړو فرصتونه چمتو شوي دي
نن پنجشنبه د وري په ۱۹مه، د شهیدانو او معلولینو چارو وزارت د خدمتونو وړاندې کوونکې او ملاتړ مرستیالې په مشرۍ د کورنیو چارو وزارت او ملي امنیت عمومي ریاست له استازو سره ګډه ناسته وکړه او د نظامي شهيدانو ورثې او معلوليت لرونکو وګړو لپاره يې په تحصيلي بورسونو کې د اسانتياوو را منځته کولو په هکله خبرې وکړې.
اغلې نورستانۍ د یادو ادارو له استازو څخه په ناسته کې د ګډون له امله مننه وکړه وويل: د نظامي شهیدانو وارثین او معلولیت لرونکي وګړي د هیواد د ځمکنۍ بشپړتیا او ملي ارزښتونو د ساتنې لپاره قرباني ورکوي او لازمه ده چې د قربانیانو او سرښندنو درناوی يې وشي.
اغلې نورستاني څرګنده کړه، چې د دوست هېواد هندوستان د نظامي شهیدانو وارثینو او معلولینو لپاره د (ICCR)، ۳۳۴ تحصيلي بورسونه ځانګړي کړي او د وړ او مستحقو کسانو د ورپېژندلو لپاره به له مسوولو بنسټونو سره په ګډه کار وکړو.
د کورنیو چارو وزارت او ملي امنیت عمومي ریاست استازو هم د شهيدانو او معلولينو وزارت سره په اړونده چارو کې د همکاريو پر زياتوالي ټينګار وکړ او ژمنه يې وکړه، چې يادو بورسونو ته د مستحقو کسانو د ورپېژندلو په موخه به په راتلونکې اوونۍ کې د وړ کسانو نوملړ د شهيدانو او معلولينو چارو وزارت سره شریک کړي او په دې تړاو به د دفاع وزارت سره هم لازمه همغږي وکړي.
همدارنګه د ناستې په پای کې د شهيدانو او معلولينو چارو وزارت د ټولنیزو خدمتونو د تنظيم رياست ته دنده وسپارل شوه، چې د لوړو زده کړو، پوهنې، عامې روغتيا وزارتونو او د معلوماتو او احصايې له ملي ادارې سره په آنلاین ډول د زده کوونکو د راجسټریشن، شهادتنامو، بریښنایي پېژندپاڼو او روغتيايي وضعيت د ليدلو په هکله دې له يادو ادارو سره همغږي وکړي، څو پروسه اسانه او چټکه پر مخ ولاړه شي.
