د شهيدانو او معلولينو چارو وزارت کې د نيالګي کينولو کمپاين پيل شو
د شهيدانو او معلولينو چارو وزارت کې د نيالګي کينولو کمپاين پيل شو
نن چهارشنبه د کب په ۲۰مه، د شهيدانو او معلولينو چارو سرپرست وزير پوهنمل حميدالله فاروقي، د وزارت له مرستيالانو، سلاکارانو، رئيسانو او کارکوونکو سره يو ځای د نيالګي کينولو ملي ورځې په مناسبت د وزارت په انګړ کې نيالګیي کينول او له ټولو هېوادوالو يې وغوښتل، چې د هېواد په ابادۍ او ښيرازۍ کې ګډون وکړي او نيالګي کينوي.
په پيل کې ښاغلي فاروقي د کب ۲۰مې د نيالګي کينولو ملي ورځې په پار د مبارکۍ ترڅنګ زياته کړه، چې د کب ۲۰مه د نيالګي کينولو ملي ورځې په توګه يوه تاريخي او ملي ورځ ده، چې ټول هېوادوال بايد په دې ورځ د هيواد په ابادۍ،ښيرازۍ او د سالم چاپيريال په را منځته کولو کې پراخه ونډه واخلي.
نوموړي د پاک چاپيريال په رامنځته کولو ټينګار وکړ او دا يې د ټولو هېوادوالو ملي او انساني مسووليت وګاڼه.
د ښاغلي فاروقي په خبره، چې نړيوال اقلم مخ پر بدليدو دی او نړيوال چاپيريال اوسمهال پر هر اړخيز بحث او جنجال بدل شوی دی.
نوموړي څرګنده کړه، چې د يو وياړلي ملت په توګه موږ بايد د چاپيريال په هکله خپل نړيوال او انساني مسووليت په سم ډول ادا کړو او د هوا ککړتيا د مخنيوي په پار هلې ځلې وکړو.
