د شهیدانو او معلولینو په چارو کې د دولت وزارت د بیرغ ملي ورځ ونمانځله
د شهیدانو او معلولینو په چارو کې د دولت وزارت د بیرغ ملي ورځ ونمانځله
نن سه شنبه د زمري اوومه، چې د بیرغ ملي ورځې سره برابره ده، د شهیدانو او معلولینو په چارو کې د دولت وزارت د بیرغ ملي ورځ د یوې شاندارې غونډې په ترڅ کې ونمانځله.
د نمانځنې په دې غونډه کې د وزارت د رهبرۍ غړو، کارکوونکو او ځینو بهرنیو مېلمنو ګډون درلود.
په پیل کې د فرهنګي چارو سلاکار د شهیدانو او معلولینو په چارو کې د دولت د وزیر ښاغلي لعل الدین آریوبي پیغام ولوست، چې پکې یې هېوادوالو ته د دغې پرتمینې ورځې مبارکي وویلې وه او د بیرغ ساتنې او دفاع په برخه کې یې د شهیدانو د کورنیو، معلولیت لرونکو وګړو، امنیتي او دفاعي ځواکونو سرښندنې او قربانۍ ستاینه کړې وه.
د وزارت د تخنیکي چارو مرستیالې جمیلې نورستانۍ ټولو ګډونوالو ته د بیرغ د ملي ورځې مبارکي وویله او دا یې د هر افغان لپاره احساس پارونکې ورځ وګڼله، وویل ملي بیرغ زموږ ملي هویت او د ملي یووالي سمبول دی. بیرغونه ملتونه د خپلو ملي ګټو ساتنې لپاره تر یو چتر لاندې راټولوي او د دې تر څنګ یو نړیوال پېژاند دی.
د ټولنیزو خدمتونو رییس سید عالم هاشمي هم په خپلو خبرو کې دغه ورځ د افغانانو ویاړ وګڼه او ټولو ته یې د دې ورځې په مناسبت مبارکي وویله.
امنیتي ځواکونو ملي بیرغ ته د درناوي په موخه مارش ترسره او سیف الرحمن عیار لمر د بیرغ په مناسبت خپل شعر ګډونوالو ته واوره چې د ټولو احساسات یې راوپارول.
