د شهیدانو او معلولینو چارو د ولایتي آمرینو د وړتیا لوړونې او همغږۍ ورکشاپ پیل شو
د شهیدانو او معلولینو چارو د ولایتي آمرینو د وړتیا لوړونې او همغږۍ ورکشاپ پیل شو
نن سه شنبه (د سلواغې میاشتې ۲۲ نېټه) د شهیدانو او معلولینو په چارو کې د دولت وزارت له لوري د شهیدانو او معلولینو چارو ۳۳ ولایتي آمرینو ته د وړتیا لوړونې او همغږۍ دوه ورځنی جوړ شوی ورکشاپ د وزارت د تخنیکې مرستیالې جمیلې نورستانۍ په وینا پیل شو.
آغلې جمیلې نورستانۍ د شهیدانو او معلولینو چارو ټولو ولایتي آمرینو ته د ښه راغلاست تر څنګ د یاد ورکشاپ پر څرنګوالي او ارزښت خبرې وکړې وویل، چې د وزارت او ولایتونو تر منځ د همغږۍ رامنځته کېدو په موخه د ورکشاپ د جوړولو ډېره اړتیا لیدل کېده، ځکه ډېری آمرین نوي ګمارل شوي او د وزارت رهبرۍ سره ناسته یې ضروري وه.
آغلې نورستانۍ په تېر یوه کال کې د آمرینو کارونه او فعالیتونه ارزښتناک وګڼل زیاته یې کړه، چې وزارت د یوې نوې رامنځته شوې ادارې په توګه ګڼو ستونزو سره مخ و، خو د ټولو ژمنتیا، مشترک کار او هلې ځلې وې، چې پر ستونزو برلاسي شوو.
آغلې نورستانۍ د ۱۳۹۸ل کال د فعالیتونو او لاسته راوړنو په اړه هم خبرې وکړې او ټینګار یې وکړ، چې په ۱۳۹۹ل کال کې باید روڼتیا، د خدمتونو او اسانتیاوو چټکتیا او معلولینو او د شهیدانو کورنیو ته د مناسبو فرصتونو پر رامنځته کولو تمرکز زیات شي.
د یادونې وړ ده، چې یاد ورکشاپ به دوه ورځې دوام وکړي او د اړوندو برخو رییسان به ولایتي آمرینو ته د کړنلارو، پالیسو او مېکانېزمونو په اړه پرزنټېشنونه وړاندې کړي او په پای کې به ګروپي کار هم ترسره شي.
