د شهیدانو او معلولینو چارو وزارت مرستیال د کنړ ولايت زلزله ځپلو سیمو ته سفر وکړ
د شهیدانو او معلولینو چارو وزارت مرستیال محترم شیخ صاحب عبدالحکیم حقاني تر مشرۍ لاندې یو پلاوي چې د مالي او حسابي چارو رئيس محترم مولوي محمد امین دروېش او ټولنيزو خدمتونو د تنظيم رئيس محترم مولوي ثناء الله فرقاني يې ملتيا کوله، د ختیځ زون او په ځانګړي ډول د کنړ ولايت هغو سیمو ته یې سفر وکړ چې د وروستۍ زلزلې له امله زرګونه تنو هیوادوالو ته درانه ځاني او مالي زیانونه اوښتي دي او د ګڼ شمېر کورنیو ژوند یې له سختو ستونزو سره مخ کړی دی.
محترم شیخ صاحب له زلزله ځپلو سره یې خواخوږي او همدردي څرګنده کړه، د متضررو کورنیو سره يې یو میلیون (۱۰۰۰۰۰۰) افغانۍ نغدي مرسته ترسره کړه، د دې سربیره (۵۰) عرادې ویلچرونه هم پر مستحقو کسانو ووېشل شول.
همداراز محترم شیخ صاحب عبدالحکیم حقاني د کنړ ولایت له والي محترم مولوي قدرت الله سره هم ليدنه وکړه، د دې ليدنې پر مهال د کنړ ولايت د والي مرستيال، د شهيدانو او معلولينو چارو رئيس محترم مفتي عبید الله حقاني، د امنيه قومندان او ځینو نورو چارواکو هم حضور درلود.
د شهیدانو او معلولینو چارو وزارت مرستیال د کنړ ولايت له والي څخه وغوښتل چې د زلزله ځپلو کورنیو لپاره بنسټیز پروګرامونه ترلاس لاندې ونيسي تر څو د هغوی ستونزو ته په بشپړ ډول رسيدګي وشي.
د دې ترڅنګ محترم شیخ صاحب عبدالحکیم حقاني د کنړ ولايت د شهيدانو او معلولينو چارو رياست لپاره د نوې ځانګړې شوې ودانۍ څخه هم لیدنه وکړه.
