د شهیدانو او معلولینو چارو په وزارت کې د یتیمانو لپاره د معیاري تعلیمي کمپلکس د جوړولو په موخه غونډه ترسره شوه
د شهیدانو او معلولینو چارو وزارت د یتیمانو د لا ښه ملاتړ او هغوی ته د تعلیمي فرصتونو د برابرولو په موخه، د مسلم هنډز نړیوالې مؤسسې له استازو سره، په کابل ښار کې د یتیمانو لپاره د معیاري تعلیمي کمپلکس د جوړولو پر څرنګوالي کاري غونډه ترسره کړه.
دغه غونډه د وزارت د پلان، بهرنیو اړیکو او تقنین چارو رئیس محترم مولوي ثناء الله فرقاني په مشرۍ جوړه شوې وه، چې پکې د مسلم هنډز نړیوالې مؤسسې رئیس محترم محمد آصف فولاد او ورسره راغلي تخنیکي پلاوي هم ګډون کړی وو.
د غونډې په پیل کې محترم مولوي ثناء الله فرقاني د یتیمانو لپاره د معیاري تعلیمي کمپلکس جوړول یو مهم او بنسټیز ګام وباله او ویې ویل چې دا پروژه به د یتیمانو د زده کړو، روزنې او هر اړخیز پرمختګ لپاره مناسب چاپېریال رامنځته کړي، هغه د مسلم هنډز نړیوالې مؤسسې د همکاریو او هڅو ستاینه وکړه او ټینګار یې وکړ چې د یتیمانو د ژوند ښه والی او هغوی ته د ښو خدمتونو وړاندې کول د وزارت له لومړیتوبونو څخه دي.
وروسته د مسلم هنډز نړیوالې مؤسسې تخنیکي پلاوي د یاد تعلیمي کمپلکس د طرحې او جوړولو د لومړنیو چارو په اړه هر اړخیز معلومات وړاندې کړل. د وړاندې شویو معلوماتو له مخې، په دې کمپلکس کې به یوه څلورپوړیزه اداري ودانۍ، د زدهکوونکو لپاره د لوبو میدان، مجهزه طعامخونه، لیلیه، یو څلورپوړیز تعلیمي مرکز چې (۴۲) درسي او اداري خونې به ولري، جومات، د غونډو عصري تالار او د موټرو لپاره مناسب تمځای جوړ شي.
د یادونې وړ ده، چې د دې تعلیمي کمپلکس د جوړولو چارې به د (۲۰) میاشتو په موده کې بشپړې شي.
