په بلخ ولایت کې څه باندې څلور (۴) میلیونه افغانۍ د شهیدانو او معلولینو پر کورنیو ووېشل شوې
د بلخ ولایت د شهیدانو او معلولینو چارو ریاست د ژمي په را رسیدو سره د شهیدانو کورنیو او معلولینو د لومړنیو اړتیاوو پوره کولو او د هغوی ستونزو ته د ښې رسیدګۍ په موخه، د اسلامي رفاه خیریه مؤسسې سره په همکارۍ (۴) میلیونه، (۷۰) زره او (۳۰۰) افغانۍ د شهیدانو او معلولینو پر (۱۰۱) مستحقو کورنیو باندې ووېشلې، چې هر کورنۍ ته په ترتیب (۴۰) زره او (۳۰۰) افغانۍ د نغدي مرستې په توګه ورکړل شوې.
د مرستو د وېش پر مهال د بلخ ولایت د شهیدانو او معلولینو چارو ریاست مسؤلینو د اسلامي رفاه خیریه مؤسسې له مرستو او همکارۍ مننه وکړه او هیله یې وښوده چې په راتلونکي کې هم د یتیمانو، کونډو او معلولینو سره ورته مرستې ترسره شي، ترڅو د هغوی پر وړاندې شته ستونزو ته په ښه توګه رسیدګي وشي.
د یادونې وړ ده چې تر دې مخکې هم د شهیدانو او معلولینو چارو ریاست د یادې خیریه مؤسسې سره په همغږۍ له سلګونو تنو یتیمانو،کونډو او معلولینو سره ورته مرستې ترسره کړې وې.
