د شهیدانو او معلولینو چارو وزارت د راتلونکو پنځو کلونو لپاره د پروګرامونو، مهمو فعالیتونو او د لومړیتوب لرونکو پراختیایي پروژو د پېژندلو او تفکیک په موخه غونډه ترسره شوه
د شهیدانو او معلولینو چارو وزارت د راتلونکو پنځو کلونو لپاره د پروګرامونو، مهمو فعالیتونو او د لومړیتوب لرونکو پراختیایي پروژو د پېژندلو او تفکیک په موخه غونډه د وزارت د مالي او اداري چارو عمومي رئیس محترم مولوي کلیم الله افغان په مشرۍ ترسره شوه، په دې غونډه کې د کارکوونکو چارو رئیس محترم مولوي محمد موسی صدیقي، د شهیدانو چارو رئیس محترم ملا روح الله نصرت، د بهرنیو اړیکو، پلان او تقنین رئیس محترم ملا صدو خان حقشناس، د معلولینو چارو رئيس محترم مولوي شاه ولي، د معلولینو د بیاځواکمنتیا ریاست آمر محترم زاهد الله آفاقي، د تقنین او پالیسي کارپوه محترم ګل احمد عثماني او د دفتر ریاست کارکوونکي محترم سید حامد هاشمي شتون درلود.
په دې غونډه کې د شهیدانو او معلولینو چارو وزارت د پراختیایي پروژو او د لومړیتوب لرونکو پروګرامونو د تفکیک او پيژندلو په اړه بحث او تفصیلي خبرې وشوې، په پام کې ده چې د دې وزارت د پروګرامونو، مهمو فعالیتونو او د لومړیتوب لرونکو پراختیایي پروژو طرحه له ارزونې او نهایی کېدو وروسته، د راتلونکو پنځو کلونو لپاره د افغانستان د ملي پراختیا ستراتیژۍ کې د شاملولو او انعکاس په موخه ترتیب او له اقتصاد وزارت سره شریک شي.
په دې طرحه کې د وزارت ټول پروګرامونه، مهم فعالیتونه او د لومړیتوب وړ پروژې د راتلونکو پنځو کلونو لپاره شاملې دي، د دې طرحې په چوکاټ کې به، بنسټیزې موخې، د تطبیق ساحې، د ارزونې شاخصونه او د هرې برخې لپاره بودیجه په دقیقه او هر اړخیزه توګه په پام کې نیول کېږي، څو د پروګرامونو د پلي کولو بهیر په اغېزمن او شفاف ډول پر مخ ولاړ شي.
د غونډې په ترڅ کې ګډونوالو هم د پروګرامونو او د لومړیتوب لرونکو پراختیایي پروژو پېژندلو او تفکیک په برخو کې خپل نظریات او وړاندیزونه وړاندې کړل.
