د شهيدانو او معلولينو چارو وزارت د بهرنيو اړيکو، پلان او تقنین چارو رياست کې اداري غونډه ترسره شوه
د چارو د ښه سمون په موخه د شهيدانو او معلولينو چارو وزارت د بهرنيو اړيکو، پلان او تقنین چارو رئيس محترم ملا صدوخان حق شناس په مشرۍ په ياد رياست کې اداري غونډه ترسره شوه چی په هغه کې اړوندو آمرينو او کارکوونکو ګډون کړی وو.
په دې غونډه کې محترم ملا صدو خان حق شناس د پلان، بهرنیو اړیکو او تقنین چارو ریاست پر بنسټیز اهمیت ټینګار وکړ او زياته يې کړه: د پلان، بهرنيو اړیکو او تقنین ریاست چارې د وزارت له ټولو مرکزي او ولایتي ریاستونو سره تړلي دي چې دا چارې په تقنینی برخو، پلان او راپورونو او همداراز د خیریه مؤسسو له لارې د معلولینو، یتیمانو او کونډو لپاره د مرستو په راجلبولو باندې تمرکز لري او د دې ریاست منظمې هڅې کولای شي د ټولنې د اړمن قشر لپاره د لا ښه خدمتونو وړاندې کولو زمينه برابره کړي.
نوموړي له ټولو کارکوونکو څخه وغوښتل چې خپلې سپارل شوې دندې باید په بشپړ اخلاص، د الله تعالی جل جلاله د رضایت لپاره، د دندو لایحې او منظور شوي پلان له مخې په منظم ډول ترسره کړي.
همداراز محترم ملا صدوخان حق شناس کارکوونکو ته سپارښتنه وکړه چې د حاضرۍ او اداري نظم پابند پاتې شي او هره ورځ دې د وزارت د دعوت او ارشاد ریاست درسي غونډو کې فعاله ونډه واخلي.
د دې غونډې په پای کې د بهرنيو اړيکو، پلان او تقنین چارو رياست پر وړاندې د شته ستونزو د حل پر لارو چارو هم خبرې وشوې.
