د شهیدانو او معلولینو چارو وزارت او د (YAAR) خیریه مؤسسې ترمنځ د هوکړه لیک لاسلیک
د شهیدانو او معلولینو چارو وزارت د یتیمانو، کونډو مېرمنو او معلولیت لرونکو وګړو د ملاتړ په موخه، د (YAAR) خیریه مؤسسې سره د (۱۳) زره او (۹۶۰) ډالرو په ارزښت د همکارۍ هوکړه لیک لاسلیک کړ، چې له مخې به یې په کابل او ننګرهار ولایتونو کې (۲۵۰) تنو مستحقو یتیمانو، کونډو او معلولینو ته خوراکي توکي چمتو او ووېشل شي.
د همکارۍ دا هوکړه لیک د شهیدانو او معلولینو چارو وزارت د بهرنیو اړیکو او پلان رئیس محترم ملا صدوخان حق شناس او د (YAAR) خیریه مؤسسې مرستیال محترم صدیق الله توخي تر منځ لاسلیک شو چې د کابل او ننګرهار ولایتونو د شهیدانو او معلولینو چارو ریاستونو سره په همغږۍ به تطبیق شي.
د هوکړه لیک د لاسلیک پر مهال محترم ملا صدوخان حق شناس د یادې مؤسسې له مرستیال څخه یې وغوښتل چې یتیمانو او معلولینو ته د حرفوي زده کړو د زمینې برابرولو په برخه کې لازمه همکاري وکړي، تر څو په دې سره یاد اړمن قشر د اقتصادي پلوه په ځان بسیا او د خپلو کورنيو لپاره په خپله حلال رزق وګټي.
