د شهیدانو او معلولینو چارو په وزارت کې پر (۴۵۰) تنو مستحقینو باندې مرستې وېشل شوې
د شهیدانو او معلولینو چارو وزارت د روژې مبارکې مياشتې په ترڅ کې د مستحقو کسانو د لاسنیوي په موخه د اچ، اچ، آر، ډي نړېوالې مؤسسې سره په همغږۍ پر (۴۵۰) تنو مستحقو یتیمانو باندې مرستې چې په هغه کې بېلابېل خوراکي توکي او اختریزې ډالۍ شاملې وې، په منظم ډول ووېشلې. همداراز هر مستحق سره یوه اندازه نغدي مرسته هم ترسره شوه.
د مرستو د وېش پر مهال د ټولنیزو خدمتونو د تنظیم رئیس محترم مولوي ثناء الله فرقاني، د څارنې او ارزونې ریاست استازي او د مؤسسې مسؤلينو شتون درلود او د مرستو د وېش له بهیر څخه یې په بشپړ ډول نظارت وکړ.
د یادونې وړ ده، چې د اچ، اچ، آر، ډي نړېوالې مؤسسې تر دې وړاندې هم د شهیدانو او معلولینو چارو وزارت سره په همغږۍ د هېواد په مختلفو ولايتونو کې د ګڼ شمېر یتیمانو، کونډو او معلوليت لرونکو وګړو سره په بېلابېلو برخو کې مرستې ترسره کړې دي.
