د شهیدانو او معلولینو چارو وزارت د یتیمانو، کونډو او معلولینو سره د ژمنېو مرستو د برابرولو په موخه د (HHRD) مؤسسې سره دوه هوکړه لیکونه لاسلیک کړل
یاد هوکړه لیکونه د شهیدانو او معلولینو چارو وزارت د بهرنېو اړیکو او پلان رئیس ښاغلي ملا صدوخان حق شناس او د (دست های کمک برای پیشرفت و کمک) یا(HHRD) مؤسسې رئیس ښاغلي عبیدالله فیصل تر منځ لاسلیک شول چې د یو هوکړه لیک له مخې به نه سوه (۹۰۰) تنو یتیمانو، کونډو او معلولیت لرونکو وګړو باندې ژمنۍ مرستې (البسه، کمپلې او د ګاز دبې) شاملې دي په سرپل، زابل، تخار او پکتیا ولایتونو کې پر یادو کسانو وویشل شي.
د دوهم تړون له مخې به چې په هغه کې (جامې، کمپلې، قرطاسیه او د حفظ الصحې توکي) شامل دي په کابل، ننګرهار او لغمان ولایتونو کې به پر دولس سوه او پنځوسو (۱۲۵۰) تنو مستحقو کسانو وویشل شي.
د يادونې وړ ده، چې د ياد شویو تړونونو د پلي کېدو ټوليز ارزښت پنځه اویا زره (۷۵۰۰۰) امريکايي ډالره دى، چې دواړه به يې په راتلونکو دوو مياشتو کې بشپړ شي.
