د شهيدانو او معلولينو چارو وزارت او د هېواد لوړو زده کړو مؤسسې ترمنځ د (۳۰۰) تحصيلي بورسونو هوکړه ليک لاسليک شو
د شهيدانو او معلولينو چارو وزارت او د هېواد لوړو زده کړو مؤسسې ترمنځ د (۳۰۰) تحصيلي بورسونو هوکړه ليک لاسليک شو
نن پنجشنبه د وري په ۵مه، د شهيدانو او معلولينو چارو وزارت د برنامو او همغږۍ مرستيالې آغلې صبرۍ اندړ او د هېواد لوړو زده کړو موسسې رئيس عطامحمد هلوک ترمنځ د شهيدانو ورثې او معلوليت لرونکو وګړو لپاره د شاهين خيريه بنسټ په مالي ملاتړ د (۳۰۰) تحصيلي بورسونو هوکړه ليک لاسليک شو.
په همدې تړاو رابلل شوې ناسته کې آغلې اندړ د وزارت په استازيتوب د شاهين خيريه بنسټ او هېواد خصوصي پوهنتون مشرتابه څخه مننه وکړه، چې د ټولنې جنګ ځپلي او زيانمن قشر سره د زدکړو په برخه کې له وزارت سره همکاري کوي او د همدې قشر لپاره د زدکړو زمينه برابروي.
نوموړې څرګنده کړه، چې د شهيدانو او معلولينو چارو وزارت رهبري هييت په دې هڅه کې ده، چې له نورو خصوصي تحصيلي موسسو او پوهنتونونو سره هم ورته هوکړه ليکونه ولري، څو د شهيدانو ورثې او معلوليت لرونکي وګړي د زدکړو له نعمت څخه برخمن او پر ځان بسيا شي.
د هېواد د لوړو زده کړو موسسې رئيس عطامحمد هلوک د شهيدانو ورثې او معلولينو پر وړاندې د ټولنې ټول وګړي مکلف وګڼل، چې د ژوند په هره برخه کې د وس مطابق د هغوی لاسنيوی وکړي.
نوموړي زياته کړه، چې ډېر د وياړ ځای دی چې د يو تحصيلي بنسټ په توګه د هېواد د لوړو زده کړو موسسه د شاهين خيريه بنسټ په مالي ملاتړ ددې قشر سره د زده کړو په برخه کې د خدمت فرصت مومي او ژمنه يې وکړه، چې په راتلونکي کې به هم په دې تړاو خپلو همکاريو ته دوام ورکوي.
د يادونې وړ ده، چې ياد تحصيلي بورسونه به د شهيدانو ورثې او معلوليت لرونکو وګړو لپاره په وړيا ډول په بېلا بېلو پوهنځيو کې د ليسانس په کچه د شاهين خيريه بنسټ په مالي ملاتړ د څلورو کلونو لپاره د پلې کېدو وړ وي.
