د شهیدانو وارثینو او معلولیت لرونکو وګړو د ښوونې، روزنې او مالي ملاتړ په موخه د اسلامي هیوادونو له سفیرانو سره د همغږي ناستې به پیل شي
د شهیدانو وارثینو او معلولیت لرونکو وګړو د ښوونې، روزنې او مالي ملاتړ په موخه د اسلامي هیوادونو له سفیرانو سره د همغږي ناستې به پیل شي
د شهيدانو او معلولينو چارو سرپرست پوهنمل حمیدالله فاروقی، د اسلامي همکاریو په سازمان کې د افغانستان سفیر ښاغلي دوکتور شفیق صمیم سره وکتل او د اسلامي هیوادونو د مرستو د جلبولو په تړاو يې خبرې اترې وکړې.
په پيل کې د اسلامي همکاریو په سازمان کې د افغانستان سفیر، ښاغلي دوکتور شفیق صمیم ښاغلي فاروقي ته د یاد وزارت د سرپرست او نوماند وزیر په توګه د ګمارنې مبارکي وویله او زیاته یې کړه، د اسلامي همکاریو سازمان غړي د شهیدانو وارثینو او معلولیت لرونکو وګړو لپاره تعلیمي او تحصیلي فرصتونه لري، ددې سازمان غړي د یاد قشر د مالي کومکونو لپاره په بیلابیلو برنامو کار کوي تر څو دا قشر په لنډ مهال او اوږدمهاله توګه له اقتصادي پلوه په ځان بسیا شي.
د ښاغلي صمیم په خبره، د اسلامي همکاریو سازمان غړو هیوادونو او د یاد وزارت د مشرتابه ترمینځ د همغږي او همکاري ناستې به تنظیم کړي تر څو یې کومکونه جلب او اړمنو خلګو ته ورسوي.
د شهيدانو او معلولينو چارو سرپرست او نوماند وزير، پوهنمل حمیدالله فاروقی د اسلامي هیوادونو او یاد وزارت تر مینځ د همغږي ایجاد د ټولو معلولينو هيله وبلله او په دې اړه يې د هر اړخيزې همکارۍ ډاډ ورکړ.
ښاغلي فاروقی څرګنده کړه، د وزارت مشرتابه بشپړ چمتوالی لري چې له نړیوالو مرستندویه هیوادونو سره اړیکې جوړې کړي او د شته بشري ظرفیت پر مټ کومکونه جلب او اړمنو وګړو ته ورسوي.
