په بلخ ولایت کې د شهیدانو او معلولینو پر (۵۰۰) کورنیو باندې د خوراکي توکو مرستې ووېشل شوې
د بلخ ولايت د شهیدانو او معلولینو چارو رياست د اړمنو کسانو د لاسنیوي او ملاتړ په موخه د يوې خیریه مؤسسې سره په همغږۍ، د شهیدانو او معلولینو پر (۵۰۰) مستحقو کورنيو باندې د خوراکي توکو مرستې ووېشلې، په یادو مرستو کې اوړه، غوړي، وريجې او ځینې نورخوراکي توکي شامل وو.
د مرستو د وېش پر مهال د بلخ ولایت د شهیدانو او معلولینو رئیس، محترم مولوي جان محمد حکمت وویل:
یاد ریاست د روان کال له پیل راهیسې تر اوسه پورې (۲۰۰۰) کورنیو ته د خوراکي توکو بېلابېلې مرستې وېشلې دي. نوموړي ډاډ ورکړ چې د اړمنو کسانو لپاره به نورې مرستې هم برابرې شي، څو هغوی وکولای شي د ژوند لومړنۍ اړتیاوې په اسانه توګه پوره کړي.
په ورته وخت کې، هغو کسانو چې مرستې ترلاسه کړې وې، د اسلامي امارت، خیریه بنسټونو او همکارو ادارو مننه وکړه او هیله یې وښوده چې دا لړۍ دوام ومومي او نورې اړمنې کورنۍ هم تر پوښښ لاندې ونیول شي.
