د شهیدانو او معلولینو چارو وزارت د کارکوونکو چارو رئیس د اداري اصلاحاتو او ملکي خدمتونو ریاست د څارنې او ارزونې برخې له استازو سره وکتل
د شهیدانو او معلولینو چارو وزارت د کارکوونکو چارو رئیس محترم مولوي محمد موسی صدیقي د کارکوونکو د ارزونې پروسې پر مخ وړلو د څرنګوالي په موخه د اداري اصلاحاتو او ملکي خدمتونو ریاست د څارنې او ارزونې برخې له استازو هر یو محترم عبیدالله پژهان او محترم سمیع الدین صمیم سره په خپل کاري دفتر کې وکتل.
په دې کتنه کې محترم مولوي محمد موسی صدیقي د کارکوونکو د ارزونې پر اهمیت او ارزښت تفصیلي خبرې وکړې او زیاته یې کړه: د چارو څخه په مؤثر او دومدار ډول ارزونه کولای شي د کارکوونکو د قوت او کمزوریو په پېژندلو کې مرسته وکړي، د کارکوونکو ترمنځ د مسؤلیت احساس زیات کړي، هغوی په خپلو دندو کې ډیرو هڅو ته ژمن کړي او په دندو کې د شته نیمګړتیاوو د له منځه وړلو لپاره هم ګټوره واقع کېږي.
په پام کې ده، چې د ملکي خدمتونو د کارکوونکو ترسره شوي اجراآت او فعالیتونه به، د هغوی د دندو لایحو، کاري پلان او کلني اجراآتو د راپورونو پر بنسټ و ارزول شي، شته ستونزې او نیمګړتیاوې به، په نښه او د حل په موخه به یې لازم تصمیمونه ونیول شي.
