د شهیدانو او معلولینو چارو وزارت د رهبرۍ شورا غونډه ترسره شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر، ښاغلي ملا عبدالمجید آخند په مشرۍ، د شهیدانو او معلولینو چارو مرستیال ښاغلي شیخ صاحب عبدالحکیم حقاني او د اړوندو څانګو د رئیسانو په شتون کې ترسره شوه.
د یادې غونډې موضوعات د شهیدانو او معلولینو چارو وزارت د دفتر رئیس ښاغلي قاري شاه محمد دوست لخوا غونډې ته وړاندې شول. په دې غوڼده کې د یتیمانو، کونډو او معلولیت لرونکو وګړو د میاشتنۍ نغدي مرستو د ورکړې د څرنګوالي طرحې په هکله هر اړخیزې خبرې اترې وشوې. په دې غونډه کې د شهیدانو او معلولینو چارو مرستیال ښاغلي شیخ صاحب عبدالحکیم حقاني تر سرپرستۍ لاندې کمیټه وټاکل شوه چې په یاده کمیټه کې د داخلي تفتیش رئیس ښاغلی مولوي احسان الله حقاني، د شهیدانو چارو رئیس ښاغلی مولوي روح الله نصرت، د معلولینو چارو رئیس ښاغلی مولوي عبدالنافع منتفع، د ډیتابیس رئیس ښاغلی ملا رحمت الله خالد او د جوزجان ولایت د شهیدانو او معلولینو چارو رئيس ښاغلی مولوي شبیر احمد شامل دي.
یاده کمیټه به د ولایتي رئیسانو لخوا رالیږل شویو معلوماتو پر اساس او د یتیمانو، کونډو او معلولیت لرونکو وګړو د ستونزو په پام کې نیولو سره د ۱۴۰۱ لمریز کال د میاشتنۍ مرستو د ورکړۍ طرحه په غور سره وڅیړي چې په دې سره به ځینې مادې تعدیل او د اړتیاوو له مخې به ځینې نورې مادې زیاتې کړي.
