د ژوند په مختلفو برخو کې د معلولیت لرونکو وګړو د اړتیاوو ټاکلو په اړه ملي سروې ترسره کېږي
د ژوند په مختلفو برخو کې د معلولیت لرونکو وګړو د اړتیاوو ټاکلو په اړه ملي سروې ترسره کېږي
د شهيدانو او معلولينو په چارو کې د دولت وزارت د برنامو او همغږۍ مرستيالې صبرۍ اندړ او ورسره پلاوي د مرکزي احصايې او معلوماتو ملي ادارې مرستيال حسيب الله موحد سره وکتل.
آغلې اندړ وزارت سره د یادې ادارې له همکاریو مننه وکړه وویل، چې د غوښتنې پر مهال یې اړتيا وړ معلومات ورسره شریک کړي دي. زیاته یې کړه: د جمهور ریيس د لارښوونې پر اساس د معلوليت د لس کلنې ملي ستراتيژۍ پیاوړتیا او تطبیق لپاره په مختلفو برخو کې ملي او باوري سروي ته اړتيا ده، تر څو په ټولو برخو کې د معلولینو اړتیاوې وټاکي او سمه رسېدنه ورته وشي. زیاته یې کړه، چې غواړو دغه سروې له ترسره کېدو وروسته په ملي او نړیواله کچه مطرحه او د نورو ګڼو سروې ګانو ځای ونیسي.
وزارت سلاکار حبیب خان ځاځي د یادې ادارې مسولینو ته د معلولیت د ملي ستراتيژۍ اړه معلومات ورکړه وویل، چې دغه ستراتېژي ۱۴ بنسټیزې موخې لري او د تطبیق لپاره یې ډېرو ارقامو او معلوماتو ته اړتیا ده.
د مرکزي احصايې او معلوماتو ملي ادارې مرستيال حسيب الله موحد وویل، چې د ستراتېژۍ د پیاوړتیا او تطبیق لپاره د معلولیت په مختلفو ابعادو کې دقیقو ارقامو ته اړتیا ده او پرته له دقیقو ارقامو د یوې ستراتېژۍ جوړول ممکن نه دي. وویل چمتو دي، چې د هېواد په کچه د معلولیت لرونکو وګړو سروې ډیزاین او ترسره کړي. زیاته یې کړه، چې د زده کړو، کارموندنې، اقتصادي پیاوړتیا، فزیکي لاسرسي او نورو ټولو اړینو برخو کې به پوښتنلیکونه ترتیب او ادارو ته به یې واستوي. نوموړي څرګنده کړه، چې د سروې په ترسره کولو او معلولینو د اړتیاوو د تشخیص لپاره له تخنیکي، تحلیلي او ارقامو راټولولو برخو کې همکاري.
موحد وویل، چې د سروې ترسره کولو لپاره به تخنیکي کمېټه جوړه او د شاخصونو له مشخصولو وروسته د سمپل سروې په ډول د ۱۴۰۰ کال په لومړۍ میاشت د معلوماتو راټول پیل کړي.
