د غزني ولایت د شهیدانو او معلولینو چارو ریاست له لوري د (HHRD) مؤسسې فعالیتونه وستایل شول
د غزني ولایت د شهیدانو او معلولینو چارو رئیس محترم ملا عبدالحکیم دانش چې د ټولنیزو خدمتونو مدير محترم نصرت الله پتمن يې ملتيا کوله، په ياد ولایت کې د یتیمانو او معلولیت لرونکو وګړو لپاره د فني او حرفوي زدهکړو له زده کړه ئيز بهیر څخه ارزونه ترسره کړه.
د دې ارزونې پر مهال محترم ملا عبدالحکیم دانش د یادې مؤسسې روان فعالیتونه او کړنې د ستاینې وړ وبللې او ټينګار يې وکړ چې دا ډول پروګرامونه د یتیمانو او معلولینو د اقتصادي ځان بسیاینې لپاره خورا مهم دي او د ورته پروګرامونو د پراخوالي او د نورو همکاریو غوښتنه یې وکړه.
همداراز د غزني ولایت د شهیدانو او معلولینو چارو رئیس د فني او حرفوي زده کړو له زدهکوونکو سره د لیدنې پر مهال هغوی ته د حاضري پر پابندۍ، زدهکړو ته د پوره ژمنتیا او د مسلکي مهارتونو د زده کولو په هکله هم لازمې سپارښتنې وکړې.
د یادونې وړ ده چې د غزني ولايت د شهیدانو او معلولینو چارو رياست د (HHRD) خيريه مؤسسې سره په همغږۍ د یو شمېر یتیمانو او معلولیت لرونکو وګړو لپاره د فني او حرفوي زده کړو، زده کړه ئيز پروګرام پر لاره اچولی، تر څو یتیمان او معلولین وکولای شي د یاد پروګرام له بشپړولو وروسته له زده کړو شويو مهارتونو څخه په ګټې اخيستنې سره له اقتصادي پلوه په ځان بسیا او د خپلې کورنۍ لپاره حلال رزق وګټي.
