د شهیدانو ورثه ؤ او معلولینو د پالنې په مرکز کې شل (۲۰) تنه یتیمان د فني او حرفوي زده کړو څخه فارغ شول
د شهیدانو ورثه ؤ او معلولینو د پالنې مرکز د بشري مرستو ټولنې په همکارۍ شپږ میاشتې وړاندې د شل (۲۰) تنو یتیمانو لپاره د خیاطۍ حرفې په برخه کې روزنیز پروګرام په لاره اچولی وو، چې نن یادو کسانو د یوې غونډې په ترڅ کې د فراغت سندونه ترلاسه کړل.
د یادو زده کوونکو په فراغت غونډه کې د شهیدانو او معلولینو چارو وزارت د کارکوونکو چارو رئیس محترم مولوي محمد موسی صدیقي، د بهرنېو اړیکو او پلان رئیس محترم ملا صدوخان حق شناس، د شهیدانو ورثه ؤ او معلولینو د پالنې مرکز رئیس محترم ملا رحمت الله خالد، د بشري مرستو ټولنې مسؤل محترم نصرت الله شینواري، د آسایشګاه د چارو آمر محترم ملا سید محمد آخند، د وزارت د کارکوونکو د استخدام آمر محترم مولوي عبدالصمد حماد، د یاد ریاست د برنامو او همغږۍ آمر محترم حفیظ الحق عمري او یو شمېر کارکوونکو ګډون کړی وو.
د دې پروګرام پر مهال د کارکوونکو چارو رئیس محترم مولوي محمد موسی صدیقي د حلال رزق ګټلو په ارزښت او اهمیت ګډونوالو ته هر اړخیزه وینا وکړه او وې ویل: د حلال رزق ګټل نه یوازې د فرد لپاره، بلکې د ټولنې د هوساینې لپاره هم مهم دي، حلال رزق هم د خدای تعالی جل جلاله د رضا سبب ګرځي او په ټولنه کې د هر وګړي د خپلواکۍ، عزت، وقار او نورو ته د خدمت کولو او خیر رسولو لامل هم ګرځي.
هغه همداراز د یتیمانو لپاره د فني او حرفوي زده کړو د زمینې برابرولو په برخه کې د شهیدانو ورثه ؤ او معلولینو د پالنې مرکز او د بشري مرستو ټولنې هڅې وستایلې او د مؤسسې له مسؤل څخه یې وغوښتل چې دې ډول پروژو ته وده ورکړي. او یادونه یې وکړه چې د دې ډول پروژو په لاره اچول نه یوازې د یتیمانو لپاره د کاري فرصتونو په برابرولو کې مثبت بدلون رامنځته کوي، بلکې د ټولنې په پرمختګ کې هم خورا مهم رول لري.
په دې پروګرام کې د شهیدانو ورثه ؤ او معلولینو د پالنې مرکز رئیس محترم ملا رحمت الله خالد هم یتیمانو ته د خیاطۍ حرفې د پروګرام دایرولو په هکله معلومات وړاندې کړل او د بشري مرستو ټولنې له مسؤلینو څخه یې مننه وکړه چې د یتیمانو لپاره یې د دې روزنیز پروګرام د دایرولو په برخه کې پوره هڅې کړې دي.
همداراز د دې روزنیز پروګرام د تمویل کوونکې مؤسسې مسؤل محترم نصرت الله شینواري هم د بشري مرستو ټولنې له لوري د ترسره شويو فعالیتونه په هکله هر اړخیز معلومات وړاندې کړل او له فارغ شویو کسانو څخه یې وغوښتل تر څو له خپلو مهارتونو څخه د حلال رزق په پېداکولو کې ګټه واخلي.
د پروګرام په پای کې فارغ شویو کسانو ته د کسب او کار د پیل کولو په موخه اړوند تخنیکي وسایل ورکړل شول او همداراز هر فارغ شوي زده کوونکي ته (۵۰۰۰) افغانۍ هم ورکړل شوې.
